Jaqsylyq pen jamandyqtyń, adaldyq pen aramdyqtyń arajigin aıqyndaıtyn bul spektaklde ańǵal da sengish, aqkóńil de meıirimdi aqsaqal qoshaqanyn izdep júrip, tuzaqqa túsken qazdy qutqaryp qalatynyn bárimiz jatqa bilemiz. Qarapaıym qazdy emes, tańǵajaıyp danyshpan Qazbaıdy qutqarǵan aqsaqal men kempiriniń ómirine sol sátten bastap úlken ózgeris enedi. Qazbaı qarııaǵa alǵys aıtyp, «Pis qazan», «Qus esek» pen «Ur, toqpaq» atty erekshe sıqyrly syılyqtar usynǵanymen, jeztyrnaqtar túrli adam keıpine enip, syılyqtaryn tartyp alýǵa talpynady. Degenmen ádildik jeńip, aqsaqal óz maqsatyna jetedi.
Ulttyq dástúrmen utymdy bezendirilip, áýezdi ánmen, kóńildi bımen árlengen ertegi – kishkentaı kórermenderge qyzyqty kóńil kúı syılap qana qoımaı, bala sanasynyń damýy men rýhanı, adamgershilik qasıetterin boıyna sińirip, til alǵyshtyqqa, tártiptilikke, shynshyldyq pen úlkenge qurmet kórsetýge úndeıdi.
Qoıylymnyń ınssenırovka avtory – aqyn Qasymhan Begmanov. Spektakldiń sýretshisi – Altynaı Júsipáli. Qoıylymdy mýzykamen kórkemdegender – Baqbergen Baıshyǵash pen Arshyn Joldashan. Týyndyny rejısser Erkebulan Qabdyl sahnalaǵan. Aıta keteıik, ol buǵan deıin qazaqy salt-dástúr men batyrlyqty kórsetetin «Er Tóstik», jasóspirimderge arnalǵan, qazaq valsiniń koroli Shámshi Qaldaıaqovtyń ánder toptamasynan sahnalanǵan «О́mir-ózen», jolda júrý erejesi men dostyqty dáripteıtin «Aýyl ıti Aqbaı» atty kórermen suranysyna ıe shyǵarmalardy qoıǵan.
