Taý tulǵanyń talantynan týǵan týyndylar barsha ónersúıer qaýymǵa málim. «Daırabaı», «Qudasha-dýman» sımfonııalyq kúıleri, «Qamar-sulý», «Alpamys» jáne «Abylaı han» operalary, romanstary men ánderi talaı jyldan beri tyńdaǵan júrekti terbetip keledi.
Konserttiń ataýy kompozıtor Nutfolla Shákenovtiń sózine jazylǵan «Tań samaly» lıroepıkalyq ánimen baılanysty. Jas kezinde súıikti qalasy Almatydan shabyt alǵan Erkeǵalı Rahmadıev týyndyny jary Klaraǵa arnaǵan. Án KSRO Halyq ártisi Roza Baǵlanovanyń repertýarynda eldiń esinde qalyp, kóptegen jannyń súıispenshiligine bólendi. Al osy keshte kórermen bul ándi Qazaqstannyń Eńbek sińirgen qaıratkeri Bıbigúl Januzaqtyń (soprano) oryndaýynda tyńdady.
Konsert barysynda «Qamar sulý», «Alpamys» operalarynan úzindiler, «Kúnder zýlap barady», «Týǵan el týraly jyr», «Osynaý ánge salǵaısyń», «Aq tyrnalar», «Ánshi baqytty», «Shattyq valsi» jáne basqa da ánderi men romanstary shyrqaldy. Sazdy keshke Qazaqstannyń Eńbek sińirgen qaıratkeri Azamat Jyltyrkózov (barıton), «Daryn» memlekettik jastar syılyǵynyń laýreaty Altynbek Ábilda (barıton), halyqaralyq baıqaýlardyń laýreattary Áıgerim Amanjolova (soprano), Fırýza Rahmetova (soprano), Shahrızada Tynyshtyq (soprano), Altynbek Arystanbek (tenor), Talǵat Allabırınov (tenor), Nursát Almas (barıton) qatysty. Al fortepıano partııasynda – Mádenıet salasynyń úzdigi Roza Shotqalıeva óner kórsetti.
