Aıta keteıik, búginde elimizdegi taý shańǵysy týrısteriniń sany jaǵajaı týrısteriniń sanymen birdeı. Sondaı-aq atalǵan týrızm túrin úlken ekonomıkalyq tıimdilik pen aıryqsha kiris kózi retinde qaraýǵa bolady. Taý shańǵysy týrısti ortasha eseppen kúnine 250 dollar, ıaǵnı jaǵajaı týrıstine qaraǵanda 5 ese kóp qarjy jumsaıdy.
– Alaıda qazirgi tańda jumys istep turǵan kýrorttarda artyq júkteme baıqalyp otyr. Mysaly, «Shymbulaq» kýrortynda mereke jáne demalys kezinde óte kóp júkteme kúnine 12,5 myń adamdy, al ońtaıly júkteme kúnine 6 myń adamdy quraıdy. Osyǵan baılanysty Qazaqstanda taý shańǵysy týrızminiń jańa nysandaryn ashýymyz kerek, – dedi Mádenıet jáne sport mınıstrliginiń týrızm salasyna arnalǵan alqa otyrysynda vedomstvo basshysy Ashat Oralov.
Memleket basshysy Almaty qalasynyń jurtshylyǵymen kezdesýde taý-ken klasterin keshendi damytý qajettigin atap ótken bolatyn. Sondyqtan kýrorttardy aspaly joldarmen bir ekojúıege qosý, sondaı-aq jumys istep turǵan obektilerdi keńeıtý qajettiligi týyndaıdy.
– Biz ınvestorlarǵa túrli jeńildik usynyp, aspaly joldardy, ratraktar men qar atatyn zeńbirekterge ketken shyǵynnyń 25 paıyzǵa deıingi kólemin óteýge nıettimiz. Sonymen qatar taý shańǵysy kýrorttaryna qajetti qarmen jabdyqtaýdyń tutas júıesine de osyndaı óteý tetigin qarastyrý josparlanyp otyr, – dedi mınıstr.
