«Jarylǵysh zat qoıyldy», «ǵımaratta bomba bar» degen syńaıdaǵy jalǵan aqparat berýdiń arty biraz jurtty áýre-sarsańǵa salary belgili. Onyń ústine atalǵan faktilerdi tekserý biraz ýaqyt pen qarjyny talap etedi. Oqıǵa ornyna polısııa, qutqarýshylar, kınologter, órt sóndirýshiler, jedel járdem brıgadalary, jedel tergeý toptary jumyldyrylady. Kásiporyndardyń qalypty jumys rejimi buzylady.
Bul kúshtik qurylymdar jumysynyń aıtarlyqtaı aýytqýyna ákep soqtyrady, tekseriletin kommersııalyq kásiporyndar mıllıondaǵan shyǵynǵa ushyraıtyny taǵy bar. Terrorlyq shabýyl týraly jalǵan habarlamalar adamdardy evakýasııalaý kezinde dúrbeleńmen aıaqtalyp jatatyny da jasyryn emes.
Esterińizde bolsa, ótken jyly jazda Qostanaı oblysynyń bir turǵyny dál osyndaı qylmysy úshin 1 jyl 6 aıǵa bas bostandyǵynan aıyrylǵan edi. Ol kórshisinen kek alý maqsatynda onyń elektrondyq poshtasyn buzyp, sonyń atynan Astana jáne Almaty qalalarynyń 13 nysanyna (saýda ortalyqtary, áýejaılar, bankter jáne t.b.) terrorızm aktisi týraly kórineý jalǵan habarlama jibergen. Al Almaty oblysynda qurdastarymen bástesip, elektrondy poshta arqyly 3 mektepti mınalaý týraly habarlama jibergen 13 jasar bala anyqtalǵan bolatyn. Aqyr aıaǵy kámeletke tolmaǵan balany tárbıeleý jónindegi mindetin oryndamaǵan úshin oqýshynyń ata-anasy jaýapkershilikke tartyldy.
Aıta ketý kerek, quqyqtyq tártipti qorǵaý organdarynda qylmystyq jaýapkershilikke tartý úshin osyndaı quqyq buzýshylardy jedel anyqtaý praktıkalyq tájirbıesi bar. Tájirıbe kórsetkendeı, qylmyskerler tek el ishinde ǵana emes, odan tys jerlerde de áreket etedi.
Máselen, qazirgi tańda Bas prokýratýranyń úılestirýmen Jedel ózara is-qımyl maqsatynda shet memlekettermen ınternet keńistiktegi anonımdi habarlamalardyń avtorlaryna qatysty derekter almasý boıynsha Býdapesht konvensııasyna («Kompıýterlik qylmystar týraly») qosylý maqsatynda jumys júrgizilip jatyr. Sondaı-aq Bas prokýratýra múddeli memlekettik organdarmen birlesip kórineý jalǵan terrorızm boıynsha qylmystyq jaýaptylyqty kúsheıtý jáne quqyq buzýshylyqtyń osy túrin «aýyr» sanatqa jatqyzý (7 jylǵa deıin bas bostandyǵynan aıyrý merzimi) týraly máseleni kóterip júr.
