Munda keshendi medısınalyq-áleýmettik, psıhologııalyq-áleýmettik jáne áleýmettik-pedagogıkalyq jaǵynan ońaltý júzege asady. Sondaı-aq Abaı oblysynyń alys aýdan, aýyldarynan kelgenderge 1 aıdan 6 aıǵa deıin ýaqytsha turýǵa múmkindik qarastyrylǵan. Barlyq bólmeler men kabınetter qajetti medısınalyq jıhazdarmen jáne otandyq, sheteldik zamanaýı ońaltý jabdyqtarymen qamtamasyz etilgen. Ortalyqta 14 oqý orny bar kitaphanasy bar bolsa, onyń ekeýi múgedekter arbasyna arnalǵan. Termogıdroterapııa bólimshesinde eki emdik basseıni de bar.
«Memleket basshysynyń tikeleı tapsyrmasymen irgesi qalanǵan biregeı ortalyq 200 mamandy turaqty jumyspen qamtymaq. Bilikti mamandar zamanaýı tehnıkalyq ońaltý quraldaryn qoldaný arqyly ár em alýshyǵa jeke baǵdarlama ázirleıdi. Bul nysannyń oblysymyz úshin de, qalamyz úshin de mańyzy zor», dep atap ótti Abaı oblysynyń ákimi Nurlan Uranhaev.
Ortalyqtyń ashylý saltanatyna Eńbek jáne halyqty áleýmettik qorǵaý vıse-mınıstri Erbol Ospanov arnaıy keldi.
Memleket basshysynyń 2020 jyly bergen tapsyrmasymen birinshi kezekte 12 ońaltý ortalyǵyn ashý josparlanǵan edi. Sonyń ishinde birinshi bolyp Semeı qalasynda ashylyp otyrǵanyna qýanyshtymyn. Abaı oblysy boıynsha 24 myńnan asa múgedektigi bar azamat tirkelgen. Bul – osynshama otbasy, demek arnaıy qyzmetke muqtaj balalardy tárbıelep otyrǵan ata-analar. Endi jylyna 4 myńnan asa adam ortalyq qyzmetin paıdalana alady, – dedi vıse-mınıstr.
Ońaltý ortalyǵynda psıhonevrologııalyq patologııasy bar, tirek-qımyl apparaty buzylǵan múgedek balalar jáne birinshi jáne ekinshi top múgedektigi bar adamdar em-dom alyp, ońaltýdan óte alady.
Erzat JANATULY,
jýrnalıst
