«Taǵy bir mańyzdy másele – Astananyń kólik júıesin damytý. Avtokólik sany jyl saıyn kóbeıip jatyr. Sol sebepti, kólik keptelisi óte kúrdeli máselege aınaldy. Bul, tipti, qala turǵyndarynyń ashý-yzasyn týǵyzyp otyr.
Máselen, Máńgilik el dańǵyly keptelisten kóz ashpaıdy. Táýelsizdik dańǵylynda salynyp jatqan kópirdiń qurylysyn osy jyldyń sońyna deıin aıaqtaý qajet. Sonymen qatar, kishi aınalma joldyń qurylysy sozylyp ketti. Onyń ústine, jańa turǵyn úı keshenderin salǵanda jol máselesi tolyqqandy eskerilmeı jatyr.
Bir sózben aıtqanda, kólik salasyn damytý jumysy aqsap tur», dedi Qasym-Jomart Toqaev elordany damytý máseleleri jónindegi keńes otyrysynda.
Osy tusta Prezıdent atalǵan máselemen júıeli túrde aınalysýǵa shaqyrdy.
«Qala joldarynyń jaı-kúıi de máz emes. Mysaly, keıbir kósheler jyl saıyn jóndeledi. Biraq kóktem shyqqanda joldyń sapasy syn kótermeıdi. Al keıbiri múldem qaraýsyz qalǵan. Bul jol salý jáne jóndeý jumystary durys júrgizilmeıdi degen sóz. Úkimet men ákimdik máseleni arnaıy baqylaýyna alý kerek. Qajet bolsa, merdigerlerdi aýystyrýǵa tıis», dedi ol.
