Eksport artyp, ımport azaıdy

Keshe Ortalyq kommýnıkasııalar qyzmetinde Premer-Mınıstrdiń orynbasary – Qarjy mınıstri Baqyt Sultanov bastaǵan birqatar mınıstrler Úkimet otyrysynda qaralǵan máseleler jóninde baspasóz máslıhatyn ótkizdi. Onda elimizdiń áleýmettik-ekonomıkalyq damýyna qatysty máseleler talqylanǵandyǵyn aıtty. Premer-Mınıstrdiń orynbasary Úkimet otyrysynda el Prezıdenti janyndaǵy Shetel ınvestorlary keńesiniń 26-shy jáne 27-shi plenarlyq otyrystarynda jarııalanǵan Memleket basshysynyń tapsyrmalaryn júzege asyrý barysy talqylanǵanyn atap ótti. «Sondaı-aq, búgingi Úkimettiń otyrysynda bıylǵy jyldyń bes aıyndaǵy Qazaqstannyń áleýmettik-ekonomıkalyq damý barysy qaraldy. Jalpy, ekonomıkada oń serpin bar jáne áleýmettik-ekonomıkalyq damý qorytyndylaryn jasaý sheńberinde biz aǵymdaǵy jyldyń qańtar-mamyr aılaryndaǵy memlekettik bıýdjettiń atqarylý qorytyndylaryn qaradyq. О́tken jyldyń osyndaı kezeńimen salystyrǵanda kórsetkishter anaǵurlym joǵary. Máselen, memlekettik bıýdjettiń kirisi 17,5 paıyzǵa nemese 461 mlrd. teńge ósimge ıe boldy. Barlyq deńgeıdegi bıýdjettiń túsimderi bes aıdaǵy jospardan 4,5 paıyzǵa artyq túsip, 3 trln. 88 mlrd. teńgeni qurady», dedi B.Sultanov. Úkimet basshysynyń orynbasary, shyǵystardyń oryndalýynda da oń ózgerister baıqalǵandyǵyn aıtty. О́tken jyldyń bes aıynda jospar 90 paıyzǵa oryndalsa, bıyl 98 paıyzǵa oryndalypty. «Bul prosesterdiń jaqsarýyna ótken jyly bıýdjettik jáne memlekettik satyp alý zańnamasyna engizilgen ózgerister áser etti deýge bolady», dep tolyqtyrdy ol. Baspasóz máslıhatynda Ekonomıka jáne bıýdjettik josparlaý mınıstri E.Dosaev, ústimizdegi jyldyń 5 aıyndaǵy elimizdiń áleýmettik-ekonomıkalyq damýynyń qorytyndylary men 2014 jylǵy ekonomıkalyq ósimniń maqsatty ındıkatorlaryndaǵy jetistikter týraly áńgimeledi. Sóıtip, ótken bes aıdaǵy eń jaǵymdy jańalyqqa toqtaldy. Birinshi toqsanda eksporttyń jalpy kólemi 22,6 mlrd. dollardy qurap, 2013 jylǵy kólemmen salystyrǵanda 1,6 paıyzǵa az bolǵanymen, jalpy mejeden 11 paıyzǵa artypty. Sonyń ishinde Keden odaǵynda eksportymyz 1,2 mlrd. dollarǵa jetipti. «О́z kezeginde Keden odaǵynan keletin ımporttyń kólemi 19,8 paıyzǵa azaıǵan jáne 2,9 mlrd. dollar kóleminde tirkelip otyr. Sondaı-aq, teńge baǵamynyń túzetilýi esebinen qymbattaǵan ımport taýarlary da 11,7 paıyzǵa kemigen, dedi Ekonomıka jáne bıýdjettik josparlaý mınıstri E.Dosaev. Ádilet mınıstri B.Imashev zııatkerlik menshiktiń keıbir máseleleri jóninde aıtty. Al Kólik jáne kommýnıkasııa mınıstri J.Qasymbek azamattyq avıasııany damytý máselelerin sóz etti. Aýyl sharýashylyǵy mınıstri A.Mamytbekov AО́K salasyndaǵy salyq salýdy jetildirý jaıly baıandady. О́ńirlik damý mınıstri B.Jámishev Memleket basshysynyń Shetel ınvestorlary keńesiniń 26-shy jáne 27-shi plenarlyq otyrystarynda bergen tapsyrmalaryn júzege asyrýdyń barysy týraly jáne Astana qalasy mańyndaǵy aımaqtardy damytýdyń keshendi jos­pary men azyq-túlik beldeýin damytý jónindegi sharalar týraly baıandap, sondaı-aq kásipkerlikti damytý máseleleri men «Bıznestiń jol kartasy-2020» baǵdarlamasynyń júzege asyrylý barysyna toqtaldy. Nurbaı ELMURATOV, «Egemen Qazaqstan».