Onyń aıtýynsha, korreksııalyq mektepterdi támamdaǵan múmkindigi shekteýli jandar úshin bul baǵyttaǵy arnaıy baǵdarlamalar qarastyrylmaǵan. Saldarynan olardy kásibı turǵyda jetildirýde, mádenıet mekemelerine jumysqa ornalasýda qıyndyqtar týyndap jatyr.
– Qazir elimizdegi erekshe balalardyń teatr mamany bolýy úshin memleketten arnaıy baǵdarlamalar ázirlenbegen. Máselen, vokal bóliminde «ym-ısharat» tilinde án aıtý mamandyǵy joq. Sonyń saldarynan korreksııalyq mektepterdi bitirgen, jany shyǵarmashylyqty qalaıtyn múmkindigi shekteýli azamattar jumysqa ornalasa almaıdy. О́ıtkeni mádenıet mekemelerine arnaıy dıplom qajet. Sondyqtan balalar kóbinese tiginshi nemese etikshi bolady. Bul biz úshin de, qoǵam úshin de ótkir másele. Biraq teatr – erekshe balalar úshin óner jolynda ózin shyńdaýǵa, áleýmetpen etene baılanysýǵa tamasha múmkindik, – dedi spıker.
Ulttyq Delfıı komıteti ókilderi múmkindigi shekteýli balalarǵa onyń ishinde estý qabileti nashar jastarmen jumys isteý jónindegi ádistemelerin jetekshilik etetin mınıstrlikterge birneshe ret usynǵan. Eger halyqtyń bul tobyna arnalǵan ilkimdi baǵdarlama qolǵa alynsa, ázirleý úderisine qatysýǵa daıyn ekenin de jetkizdi.
– Alaıda joǵary oqý oryndarynda bilim sapasyn arttyrý baǵdarlamalarynyń mazmunyn óz betinshe anyqtaıtyn akademııalyq erkindik degen bar. Bul da shyǵarmashyl erekshe azamattardyń múmkindigin keńinen nasıhattaýǵa kedergi. Komıtettiń negizgi mindetteriniń biri – múmkindigi shekteýli balalardyń bolashaq kásibin, ónerdi tańdaýy úshin ár óńirde alańdar men teatrlardy damytý. Búginde tek Petropavl qalasynda oqý oryndarymen ýaǵdalastyqqa qol jetkizildi. Sonyń nátıjesinde erekshe stýdentter shyǵarmashylyq mamandyqtar boıynsha oqýǵa múmkindik aldy. Qazir bizde horeografııany bitirgen 2 túlek bar. Buǵan qosa teatr akterlerimiz oblystyq qazaq drama teatrynda jumys istep jatyr, – dedi Q.Túspekova.
Sondaı-aq baspasóz máslıhatynda «Ym-ısharat tilinde án aıtý» nomınasııasy boıynsha Ulttyq Delfıı oıyndarynyń qazylar alqasynyń tóraǵasy Hasan Israıl ym tilin úırenýdegi problemalardyń baryn jasyrmady.
– Kórý qabileti nashar adam zattan, al estý qabileti nashar adam qoǵamnan alshaqtaıdy. Qazirgi ýaqytta basty máselemiz de – osynda. Bizdiń erekshe jandarymyz qoǵamnan bólinip ketpeýi kerek. Olar áleýmetpen bite qaınasa ómir súrýge tıis. Jalpy, Delfıı oıyndary shyǵarmashyl jastardyń ashylýyna kóp yqpaldasyp júr. Bizdiń balalar úlken sahnalarda óner kórsetip, óz talantyn jurtshylyqqa dáleldep keledi, – dedi H. Israıl.
Aıta keteıik, jýyrda elordada erekshe teatr ártisteriniń gastroldik sapary ótedi. 5 aqpanda kórermender eki márte Delfıı oıyndarynyń chempıony atanǵan ujymnyń «Skvoz tıshıný» atty konsertin tamashalaı alady. Onda estý qabileti nashar bıshiler de óner kórsetedi. Al 6 aqpan kúni teatr súıer qaýymǵa «My s toboı odnoı krovı» atty áleýmettik dramasyn usynady. Bul – Ortalyq Azııadaǵy ym-ısharat tilindegi jalǵyz spektakl. Teatr prodıýseri Quralaı Túspekovanyń aıtýynsha, mundaǵy basty maqsat – halyqtyń nazaryn erekshe balalarǵa aýdarý arqyly Qazaqstanda mesenattyq jáne qaıyrymdylyq ınstıtýtty damytý.
– Bizdiń akterlar sahnada oınamaıdy, olar sahnada ómir súredi. Talantty bala súıgen isimen aınalyssa, oǵan eshqandaı shekteý joq ekenin qazaqstandyqtar túsinse deımiz. Teatr arqyly biz balalardy qoǵamǵa beıimdep qana qoımaı, densaýlyq jaǵdaıynyń da belgili bir deńgeıde jaqsarǵanyn kórip otyrmyz. Elimizdiń ár óńirinde erekshe teatr trýppalaryn qurýdy josparlap otyrmyz, – dedi Q.Túspekova.
Jalpy, 2019 jyly erekshe teatr elimizdiń 20 qalasynda jáne halyqaralyq festıvalderde óner kórsetken. Tipti 2020 jyly Qyrǵyzstannyń Bishkek qalasyna arnaıy shaqyrylǵan. Delfıı komıtetiniń aıtýynsha, qazirdiń ózinde TMD elderinen usynys jıi túsedi. Bul qarjylyq qoldaýdyń bolmaýyna baılanysty ázirge múmkin bolmaı tur. Sondyqtan olar múmkindigi shekteýli jastardyń shyǵarmashylyq jetistikterin nasıhattaý jáne elimizde mesenattyq jáne qaıyrymdylyq ınstıtýtyn damytý baǵytynda birqatar mádenı is-shara ótkizýdi josparlap otyr.
