Agenttiktiń málimetinshe, aldymen 6,4 jáne 6,6 magnıtýdaly eki jer silkinisi Nýrdagy jáne Islahıe aýdanynda tirkelgen. Odan soń jerasty dúmpýi Adana, Ankara, Antalıa, Gazıantep, Kaıserı, Mersın, Trabzon, Ýrfa, Hataı, Osmanıe, Shanlyýrfa, Dııarbakyr, Malatııada jarty saǵat boıy tolastamaǵan. Sondaı-aq Mysyr, Lıvan, Sırııa, Irakta da sezilgen. Jer silkinisinen keıin 32 after silkinis tirkelgen. Eń kúshtisiniń magnıtýdasy – 6,6.
Qazir elde eń joǵary tótenshe jaǵdaı jarııalandy. Bılik halyqaralyq kómekke júgindi. Barlyq jerde izdestirý-qutqarý jumystary men zalaldy baǵalaý jumystary júrgizilip jatyr. «Elde dabyldyń eń joǵary deńgeıi jarııalandy. Biz Tótenshe jaǵdaılar basqarmasymen birge óńirge qutqarýshylar jiberdik», dedi túrik eliniń IIM.
Osy ýaqytqa deıin Malatııa provınsııasynda 23 adam qaza taýyp, 420 adam jaralanǵan, Dııarbakyr provınsııasynda 6 adam ólip, 79 adam jaraqat aldy, ondaǵan ǵımarat qıraǵan. Shanlyýrfa provınsııasynyń gýbernatory Salıh Aıhan 15 adam qaza taýyp, 30 adam jaralanǵanyn habarlady. Anadoly agenttiginiń sońǵy aqparatyna súıensek, alapat jer silkinisi saldarynan eldiń 10 provınsııasynda kóz jumǵandar sany 1000-ǵa jýyqtaǵan. Buǵan qosa, Túrkııaǵa irgeles jatqan Sırııa eli de zilzaladan qatty zardap shekken, jergilikti densaýlyq saqtaý mınıstrliginiń málimetinshe, 500-den asa adam qaza tapqan.
Sırııanyń Aleppo, Idlıb, Latakııa, Hama qalalarynda ondaǵan adam ǵımarat qırandylarynyń astynda qaldy. Sırııa úkimeti Aleppo, Hama, Latakııa óńirleri eń kóp zardap shekkenin aıtady. Sırııa qorǵanys mınıstrligi bul aımaqtarǵa armııa tartý josparlanyp otyrǵanyn habarlady. Sırııa murajaılar departamentiniń málimetinshe, jer silkinisi kezinde BUU-nyń dúnıejúzilik murasy Aleppo sıtadeli zaqymdanǵan. Al Túrkııanyń ózinde tabıǵı apat saldarynan Gazıanteptegi XVII ǵasyrǵa tıesili tarıhı qamal zardap shekken. Sonymen qatar Túrkııanyń ońtústik-shyǵysyndaǵy Hantaı provınsııasyndaǵy jalǵyz áýejaıdyń ushý-qoný alańy tolyq qıraǵan. Sońǵy sanaq boıynsha 140 ǵımarat qıraǵan. Sondaı-aq Kahramanmarash pen Hantaı provınsııalarynda gaz qubyrlarynda jarylys bolǵan.
Jalpy, Túrkııa bıliginiń málimetinshe, elde kem degende 22 jerasty dúmpýi bolyp, 10 provınsııa zardap shekken. Bılik turǵyndardy kólikti paıdalanbaýǵa, úılerge kirmeýge, tótenshe jaǵdaılar qyzmetine orynsyz habarlaspaýǵa shaqyrady.
Túrkııada oryn alǵan joıqyn jer silkinisi saldarynan zardap shekkender men qaza tapqandardyń arasynda Qazaqstan azamattary joq, dep habarlady Syrtqy ister mınıstrliginiń resmı ókili Aıbek Smadııarov.
«Túrkııa Respýblıkasyndaǵy elshiligimizdiń aqparatyna sáıkes, Túrkııanyń ońtústik-shyǵysyndaǵy qýatty jer silkinisinen keıin Qazaqstan azamattarynan ótinish túsken joq. Konsýl Túrkııanyń tótenshe jaǵdaılar jónindegi basqarmasymen únemi baılanysta otyr. Qazirgi ýaqytta zardap shekkender nemese qaza tapqandar tiziminde Qazaqstan azamattary joq. Sonymen qatar qırandylardyń óte kóp bolýyna baılanysty qutqarý jumystarynyń jalǵasyp jatqanyn eskergen jón», dedi Aıbek Smadııarov vedomstvoda ótken brıfıngte.
Túrkııadaǵy sýyq habardy estı sala Memleket basshysy Qasym-Jomart Toqaev Túrkııa Prezıdenti Rejep Taııp Erdoǵanǵa kóńil aıtý jedelhatyn joldap, Úkimetke Túrkııanyń ońtústik-shyǵysynda bolǵan joıqyn jer silkinisiniń saldaryn eńserýde shuǵyl kómek kórsetýdi tapsyrdy. Osyǵan oraı Syrtqy ister mınıstrligi men Tótenshe jaǵdaılar mınıstrligi túrik bıligimen baılanys ornatty. Jaqyn arada Túrkııa úkimetiniń ótinishi boıynsha zardap shekken óńirlerge Qazaqstannyń qutqarýshylary men dárigerleri attanady.
