Tabıǵat apatynan zardap shekken túrik aǵaıynǵa otandastarymyz barynsha qoldaý kórsetip jatyr. Qaıyrymdylyq aksııalary qolǵa alynyp, Qazaqstan jurtshylyǵy qarjylaı kómek jınaýǵa belsendi kirisip ketti. Ras, zilzaladan qıyndyqqa ushyraǵan baýyrlas túrik halqynyń basyna túsken aýyr jaǵdaı eshkimdi beıjaı qaldyrmady. Osy sebepten óner salasynda júrgen barsha azamattardy «Qazaq óneriniń Túrkııaǵa kómegi» aksııasyna bir kisideı atsalysýǵa shaqyryp, úndeý jarııalaımyn.
Qadirli, tatýlyq pen turaqtylyqtyń tamyry tereńge jaıylyp, yrys pen yntymaǵy artqan qazaq jurty!
Biz – ejelden búkil túrki halyqtarynyń ata jurtymyz. Baýyrlas elder bizdiń jerimizden ártúrli sebeptermen kóship, dúnıe júziniń ár tarapyna qonys tepti. Qazaq halqy qara shańyraqta qalǵandyqtan, búkil túrki halyqtarynyń taǵdyryna jaýapty deýge tolyq negiz bar.
Men – qolymnan kelgenshe ult óneri álemdik deńgeıde baǵalansyn degen nıetpen eńbektenip júrgen qazaqtyń bir balasymyn. Kásibim de, násibim de – sýret salý. «Qaıǵydan qan jutyp otyrǵan túrik halqyna qalaı qol ushyn sozamyn?» degen oı kelip, baǵaly sýretterimdi aýksıonǵa qoıýdy jón dep taptym. Odan túsken qarajatty baýyrlas halyqqa aýdarýdy kózdep otyrmyz. Bul rette zerger, sýretshi, ánshi, akter, aqyn, jazýshy sııaqty mádenıet jáne óner aıdynynda júrgen barsha áriptesterimdi aksııaǵa belsendi atsalysyp, úndeýdi qoldaýǵa shaqyramyn. Árıne, aýksıon jumysyn uıymdastyrý ońaı sharýa emes. Bul iske qaltaly kásipkerlerdi tartyp, nátıje shyǵarýǵa bolady dep senemin. Jınalǵan qarajat arnaıy ashylǵan qorǵa túsip, zardap shekken túrik aǵaıynǵa jiberiledi.
Túrkııaǵa memlekettik deńgeıde kómek kórsetilip jatqany belgili. «Kóp túkirse – kól» demekshi, az bolsa da qoldaý kórsetý mańyzdy. Mundaı izgi amaldar artymyzdan erip kelip jatqan urpaqty tárbıeleýdiń bir úlgisi ekenin umytpaıyq.
Izgi nıetpen,
sýretshi Erbolat TО́LEPBAI
