О́tpeli shaqta ókinishter kóbeıdi

Maýsymnyń 18-inen 19-yna qaraǵan túni Brazılııada ótip jatqan álem chempıonatynda oıynnyń kezegi eń sońǵy N tobyna kelip jetýimen birge, aldyńǵy topta ekinshi týrdyń oıyndary da bastalyp ketti. Osynyń yńǵaıynda Belgııa – Aljır, Reseı – Ońtústik Koreıa komandalary birinshi ret alańǵa shyqsa, Brazılııa men Meksıka ózara ekinshi oıyndaryn ótkizdi. Osy úsh kezdesýdiń qorytyndylary boıynsha birinshiliktegi teń nátıjeler sany 3-ke jetip, jahandyq jarystaǵy eń jıi qaıtalanyp otyrǵan 2:1 kórsetkishiniń qatary 6-ǵa toldy. Bul jarys kúniniń shymyl­dyǵyn Belgııa men Aljır quramalary ashty. Mundaǵy eki taım eki túrli qalypta órbýi­men este qaldy. Onyń birinshi bóliginde bulardyń aldyńǵylarynyń biraz «janyp ketkeni» belgili boldy. Sonyń saldarynan «qyzyl periler» óziniń osy kvartettiń favorıti degen mártebesine saı qımyl kórsete almady. Olar alǵashqy 45 mınýttyqta Aksel Vıtseldiń alystan urǵan bir soqqysymen jáne Naser Shadlı týǵyzǵan bir múmkindikpen shekteldi. Onyń esesine, «ekinshi nómirmen» oınaǵan Aljır fýtbolshylary álsin-álsin qarsy shabýyldarǵa shyǵyp turdy. Sondaı joryqtardyń birinde Sofıan Fegýlı qarsy qaqpaǵa penaltı belgilenýine qol jetkizdi. Ony 25-mınýtta ózi dál uryp túsirdi. Alaıda, osy goldan keıin «shóldiń túlkileri» qarsy shabýyldaryn birjola úzgendeı keıip tanytty. Al ekinshi taımda Mark Vılmotstyń jigitteri oıyn taktıkasy men shemasyn shuǵyl ózgertip, alańǵa múldem jańa jasaq kelgendeı áser qaldyrdy. Osy tusta Drıs Mertens, Dıvok Orıgı jáne Marýan Fellaını bastaǵan fýtbolshylar Belgııa quramasy úshin birinshi taımda qol jete qoımaǵan oıyndardyń úlgisin kórsete bastady. Olardyń sát saıyn qysymy arta túsken tegeýrinine aljırlikterdiń qorǵanys shebi shydas bermeýge aınaldy. Aqyrynda Kevın de Brıýıneniń pasynan keıin Fellaını 70-mınýtta baspen soqqy jasap, tarazy basyn teńestirip ketti. Al arada týra 10 mınýt ótkende Eden Azardan dop alǵan Mertens ekinshi goldyń avtory atanyp shyǵa keldi. Esep – 2:1. Jaǵdaıdyń bulaı ózgerýine daıynsyz Aljır quramasy oıynnyń betin qaıtyp ózderine aýdara almady. Osydan keıin Brazılııa men Meksıka quramalary ekinshi týrdyń oıyndaryn bastady. Bul oıyn chempıonattaǵy teń oıyn qataryn ekige kóbeıtýmen birge, alǵash ret 0:0 degen esepti de tirkedi. Match barysynda Skoları shákirtteri aýmaq jaǵynan da, bas­tama jaǵynan da, dopty kóp ustaý jaǵynan da edáýir basym boldy. Olardyń esep ashatyndaı múmkindikteri de az bolǵan joq. Biraq sonyń báriniń sońǵy shebinde meksıkalyqtardyń qaqpashysy Gılermo Ochao qas qaqpaı turdy. Tutasynan aıtqanda, «selesao» jalpy basym bolǵanymen, dál maýsymashar matchtaǵydaı tegeýrin men jiger tanyta almady. Osyndaı aýyr oıyndy keshe tań aldynda Koreıa komandasymen alańǵa shyqqan Reseı quramasy da bastan keship, teń oıyn sanyn 3-ke toltyrdy. Bul shaıqas chempıonatta osal qarsylastyń joq ekenin baıqatty. Degenmen, Fabıo Kapellonyń sarbazdary óz múmkindikterinen tómen oıyn kórsetti. Olar kezdesýdiń biraz bóliginde belsendi qımyl kórsetken koreılerdiń birinshi bolyp gol soǵýlaryna da jol berip qoıdy. Ony 68-mınýtta Lı Gyn Ho qaqpashy Igor Akınfeevtiń óreskel qateliginen keıin túsirdi. Sodan keıin jattyqtyrýshy alańǵa Aleksandr Kerjakovty shyǵardy. Komandany jeńilisten qutqaryp qalǵan da osy shabýylshy boldy. Ol 74-mınýtta esepti teńestirdi. Keshe túnde Avstralııa – Gol­lan­dııa, Ispanııa – Chılı, al búgin tań aldynda Kamerýn – Horvatııa komandalary ózara ekinshi týr­dyń oıyndaryn oınady. Betke qol qoıylǵanǵa deıin Gollandııanyń Avstralııany 3:2 etip utqany belgili boldy. Serik PIRNAZAR, «Egemen Qazaqstan».