Úkimette bilim berý salasyn damytý jobalary qaraldy

Aqparat jáne qoǵamdyq damý mınıstri Darhan Qydyráli Jastar saıasaty tujyrymdamasynyń jobasy 6 baǵyt pen 10 nysanaly ındıkatordy jáne 72 is-sharany qamtıtynyn aıtty. Negizgi jańalyqtardyń biri – jastarmen jumys isteý jáne olardyń problemalaryn sheshý boıynsha ákimdikter jumysynyń tıimdiligin baǵalaýǵa múmkindik beretin Jastardy damytý ındeksin engizý.

«Biz 2029 jylǵa qaraı memlekettik qoldaý sharalary týraly jastardyń habardarlyǵyn 90%-ǵa deıin, volonterlik, qaıyrymdylyq jáne ekologııalyq bastamalarǵa tartylý deńgeıin 32%-ǵa deıin arttyrýdy kózdep otyrmyz», dedi D. Qydyráli.

Sonymen qatar Tujyrymdama jobasy jas kásipkerlerdiń úlesin 30%-ǵa deıin, jumyspen qamtý ortalyqtaryna júgingender arasynan jumysqa ornalastyrylǵan jastardyń úlesin 61%-ǵa deıin ulǵaıtýdy kózdeıdi.

2029 jylǵa qaraı 2,3 mln jasty jumyspen qamtý josparlanýda, onyń 1 mln-y – aýyl turǵyndary. Sonymen qatar aýyldyq jerlerde turatyn 1,5 mln jas qazaqstandyq sıfrlyq saýattylyqqa oqytylady.

Oqý-aǵartý mınıstri Ǵanı Beısembaev 2023-2029 jyldarǵa arnalǵan mektepke deıingi, orta, tehnıkalyq jáne kásiptik bilim berýdi damytý tujyrymdamasynyń jobasyn usyna otyryp, ony iske asyrý 2 jastan 6 jasqa deıingi balalardyń mektepke deıingi sapaly bilim alýyn qamtamasyz etýge múmkindik beretinin jáne mekteptegi bilim berý sapasyn arttyrýǵa yqpal etetinin atap ótti.

Úsh aýysymmen oqytatyn jáne apatty mektepterdi, oqýshy oryndarynyń tapshylyǵyn joıý arqyly jaıly jáne qaýipsiz bilim berý ortasyn qurý jóninde sharalar qabyldanady. Máseleni sheshý úshin 1,5 mln jańa oqýshy orny ashylady. Mektepter qaýipsizdik júıelerimen tolyq jabdyqtalady. 2026 jylǵa qaraı aýyldarda, shaǵyn qalalarda jáne aýdan ortalyqtarynda 5 myń mektep jańǵyrtylady.

Balalardan shyǵarmashyl, ıntellektýal jáne fızıkalyq turǵydan jetilgen tulǵa qalyptastyryp shyǵarý úshin jaǵdaı jasaýǵa, sondaı-aq balalardyń sapaly saýyǵýy men demalysyn qamtamasyz etýge qajetti deńgeıde kóńil bólinedi.

Tehnıkalyq jáne kásiptik bilim berý júıesinde qazaqstandyq jastardyń kolledjderde suranysqa ıe mamandyqtar boıynsha tegin bilim alýyna basa nazar aýdaryldy.