Memleket basshysynyń tapsyrmasyna sáıkes, Úkimet pen Pavlodar oblysynyń ákimdigi páterlerde jáne qalanyń áleýmettik nysandarynda temperatýralyq rejımdi turaqtandyrý boıynsha keshendi sharalar qabyldap jatyr.
Premer-mınıstrdiń birinshi orynbasary Ekibastuz JEO-da bolyp, táýlik boıy jóndeý-qalpyna keltirý jumystary júrgizilip jatqan ýchaskelerdi aralady. Búgingi tańda 5 qazandyq agregat jáne 11 jelilik sorǵy jumys istep tur. Taǵy 5 qazandyq pen 3 sorǵy jóndelip jatyr. Qazandyqtar jylý ótetin jerler jóndelip jatqandyqtan toqtap tur.
Jelilerde 19 aqaý tirkeldi, onyń ishinde 9-y – magıstraldyq jelilerde, 10-y – kvartal ishindegi jelilerde. 26 kóp qabatty turǵyn úıge birneshe jyldan beri jylý qalypty normadan tómen berilip keledi. Máseleni sheshý úshin mamandar ishki jylýmen jabdyqtaý júıelerin, jetkizý jelilerin tazalap, jóndeý jumystaryn júrgizip jatyr.
R.Sklıar jylýmen jabdyqtaýda týyndaǵan problemalar Úkimet deńgeıinde emes, obektiniń menshik ıesi deńgeıinde sheshilýi kerek bolǵanyn atap ótti. Osyǵan baılanysty R.Sklıar «OAО́EK» AQ ıeleriniń biri Sergeı Kannyń aldyna «Pavlodarenergo» AQ bas dırektory Vadım Lesındi jumysynan bosatý týraly másele qoıdy.
JEO ıesine eki kún merzimde qajetti býmen qamtamasyz etý boıynsha Jol kartasyn ázirleý, sondaı-aq jóndeý jumystaryn oryndaý úshin materıaldar men jabdyqtardy jetkizýdi jedeldetý tapsyryldy. Al Ekibastuz qalasynyń ákimdigine úılerdi ystyq sýmen qamtamasyz etýdi baqylaý men oǵan monıtorıng júrgizýdi kúsheıtý tapsyryldy.
«Ekibastuz qalasynda tarıfterdiń kúrt ósýine jol bermeımiz. Jylytý maýsymy aıaqtalǵannan keıin jóndeý naýqanyn júrgizemiz», dedi R.Sklıar.
Ekibastuz qalasynyń ákimi Aıan Beısekınniń aıtýynsha, úı ishindegi jylý júıesine zaqym kelgen 91 úıdiń menshik ıelerine jylý energııasy úshin tólenetin soma boıynsha 121,9 mln teńgege qaıta esepteý júrgizildi. Jeltoqsan aıynda stansııa ıesiniń esebinen jalpy somasy 241,8 mln teńgege elektr energııasy úshin ótemaqy tólendi. Bıylǵy qańtar aıynda Ekibastuz turǵyndarynyń jylýmen jabdyqtaý qyzmetterine tóleıtin somasynyń 70%-y shegerildi.
Ekibastuz qalasyna jumys sapary kezinde Roman Sklıar úılerdegi jóndeý jumystarynyń barysymen tanysyp, turǵyndarmen de sóılesti. Búgingi tańda 152 páterde jóndeý jumystary aıaqtaldy. 42 brıgada jumyldyryldy. Barlyǵy 252 páterde jóndeý jumystary júrgiziledi.
Sonymen qatar R.Sklıar №7 jáne №11 jalpy orta bilim beretin mektepterge bardy. Jekelegen kabınetterde aýa temperatýrasy 16-17 gradýstan aspaıdy, jylýmen qamtamasyz etýde irkilister bar. 7 aqpannan bastap Ekibastuzdyń oqý oryndary qashyqtan oqytý formatyna aýystyryldy, balabaqshalarda kezekshi toptar uıymdastyryldy. 13 aqpannan bastap bilim berý mekemeleri shtattyq rejımde jumys isteı bastaıdy.
