Almatylyq dárigerlerge qosymsha 1 mlrd. teńge bólinbek

Bul týraly medısına qyzmetkerlerin kásibı tól merekesimen quttyqtaý saltanatynda qala ákimi Ahmetjan Esimov málim etti. Shahar basshysy jýyrda bul máseleniń qalalyq máslıhatta qarastyrylyp, aldyn ala Densaý­lyq saqtaý mınıstri Salıdat Qaıyr­bekovamen keńeskenin jetkize kele, densaýlyq saqtaý júıesinde ter tógip júrgen salalyq mamandar men jas mamandardy qoldaýǵa 630 mln. teńge bólýdi jón dep sheshkenin, al qalǵan 370 mln. teńge Alǵabas aýylynda medısınalyq qyzmetkerlerge arnap salynatyn jataqhana qurylysyna jumsalatynyn, sondaı-aq, Áýezov aýdanynda «Jetisý-3» turǵyn úıinen aýmaǵy 4,7 myń sharshy metrlik emhana ashylatynynan habardar etti. Almatyda 30 myńǵa tarta dárigerler eńbek etýde. Bul degenińiz – elimizdegi árbir 5-shi dáriger, ár 11-shi medbıke Almatyda jumys istep jatyr degen sóz. Qalada sońǵy 4 jylda 15 densaýlyq saqtaý nysany iske qosyldy. 2012 jyldan bastap qarjylandyrý kólemi 20 paıyzǵa, 57 mlrd. teńgege artty», – dedi A.Esimov. Saltanatty jıynda Almaty qala­synda jyldyń úzdik dárige­riniń­ esimi málim boldy. Bul márte­bege­ №5 qalalyq klınıkalyq aýrý­ha­na­synyń bet-jaq hırýrgııa­sy bólimi­­niń meńgerýshisi, medısına ǵylym­darynyń kandıdaty Amangeldi Seıit­qulov laıyq dep tabylsa, qalalyq onkologııa ortalyǵy bas dárigeriniń orynbasary Oksana Shatkov­skaıa «Úzdik menedjer», «Zdrav-Expert» táýelsiz sarapshylar qaýymdas­ty­ǵy­nyń sarapshy dárigeri Bıbijan Esbergen «Jyldyń úzdik sarapshysy», Ortalyq klınıkalyq aýrýhana­nyń dárihana meńgerýshisi Tatıana Tasmaǵanbetova «Jyldyń úzdik provızory», al, №7 qalalyq klınıkalyq aýrýhananyń anestezıolog-reanımatolog dárigeri Vladımır Mýtagırov «Jyl jańalyǵy», №6 qalalyq em­ha­na­nyń ýchaskelik meıirbıkesi Aına Qa­sym­bekova «Úzdik meıirger» atalym­dary boıynsha úzdik atandy. Sonymen qatar, Almatyda medısına­lyq qyz­met­kerler kúnine oraı ótkizil­gen sharada úzdik medısınalyq qyzmet­kerlerdi «Densaýlyq saqtaý isine qosqan úlesi úshin», «Densaýlyq saqtaý isiniń úz­digi» tósbelgilerimen marapattady. Gúlzeınep SÁDIRQYZY, «Egemen Qazaqstan».