Qurmanǵazy qazaq mýzykasynyń tarıhyna ańyzǵa aınalǵan tulǵa retinde endi. Kúıshi bala kezinen alǵyrlyǵymen, ótkir tilimen erekshelenip, qos ishekti dombyrany janynan tastamady. Onyń kúılerinde týǵan jerge degen súıispenshilik, zamanynyń beınesi sýretteledi. Sondaı-aq shyǵarmalary arqyly eliniń azattyǵyn, erkindigin ańsaıdy. Búginde qazaq ónerine ultynyń únin qaldyrǵan kúıshi-kompozıtordyń esimin ulyqtaý – elge amanat.
Qazaqstannyń eńbek sińirgen qaıratkeri, professor Aıtqalı Jaıymov jetekshilik etetin Qazaq orkestri de Qurmanǵazynyń shyǵarmalaryn kezekti ret oryndap, kórermendi tánti etti. Jalpy, kúıdiń qudireti sol, dúrildete aspanǵa shapshyp oınaǵan kezde tyńdaǵan adamnyń delebesin qozdyrady emes pe?..
Atalǵan keshti ashqan memleket jáne qoǵam qaıratkeri Darhan Myńbaı ult rýhanııatynyń damýyndaǵy kúıshilik ónerdiń jáne Qurmanǵazy tulǵasynyń mańyzyna toqtaldy. Ásirese qazirgi tańda dombyra men kúı qundylyǵyna degen qoǵamnyń kózqarasy túzelý kerek ekenin atap ótti.
Kúı keshinde Qurmanǵazynyń «Aqbaı», «Kishkentaı», «Serper», «Saryarqa», «Balbyraýyn», «Kóbik shashqan», «Alataý», «Kók ala at», basqa da kúıleri oryndaldy. Sonymen qatar konsertke Qazaqstannyń eńbek sińirgen qaıratkeri Anar Muzdahanova, Mádenıet salasynyń úzdigi Ámına Boshymova, respýblıkalyq baıqaýlardyń laýreattary Muhıt Salybekov, Aıym Bekbaeva, Sultan Sárkenov, Qaırat Jumaǵalıev qatysty. Dırıjer – mádenıet qaıratkeri Nurlan Bekenov. Birtýar kompozıtordyń ólmes kúılerin Qazaq orkestriniń mýzykanttary men solısteri joǵary deńgeıde oryndady.
