Bıýro otyrysynda Senat Tóraǵasy Túrkistan qalasynda ótken Ortalyq Azııa memleketteriniń birinshi parlamentaralyq forýmyn qorytyndylady. Máýlen Áshimbaevtyń aıtýynsha, forýmǵa qatysqan elderdiń delegasııa basshylary is-shara uıymdastyrýshylyq jáne mazmundyq jaǵynan joǵary deńgeıde bolǵanyn atap ótken. Sondaı-aq qatysýshylar jańa alań óńirdegi elderdiń parlamentaralyq yntymaqtastyǵyn nyǵaıtýǵa óz yqpalyn tıgizetinine senim bildirdi.
Aldaǵy Senat otyrysynda depýtattar birqatar zańdy qaraıdy. Kún tártibine shyǵarylǵan «Úshinshi eldermen ózara saýdadaǵy tehnıkalyq kedergilerdi joıý tártibi jáne sharttary týraly kelisimdi ratıfıkasııalaý týraly» zań otandyq ónimderdi Eýrazııalyq ekonomıkalyq odaq elderiniń naryǵyna shyǵarýdy kózdeıdi. Sondaı-aq kelisim ónimniń EAEO-da jáne úshinshi eldiń aýmaǵynda belgilengen talaptarǵa sáıkestigin baǵalaý nátıjelerin ózara tanýǵa baǵyttalǵan.
Sonymen qatar senatorlar Palata otyrysynda «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy shekaralyq ókilderdiń qyzmet ýchaskeleri týraly hattamany (karta 1:200 000) ratıfıkasııalaý týraly» zańdy qaraıdy. Hattamany ratıfıkasııalaý eki el arasynda tatý kórshilik qatynastardy qoldaýǵa, ózara tıimdi ekonomıkalyq jáne ózge de yntymaqtastyqty damytýǵa, Adam quqyqtary men bostandyqtaryn qamtamasyz etýge, árbir qatysýshy memlekettiń múddelerin qorǵaýǵa arnalǵan kelisilgen shekara saıasatyn júrgizýge múmkindik beredi.
