Muqaǵalı – óleńderi eń kóp jatqa oqylatyn aqyn. №39 kitaphananyń oqý zalynda «Men – ómirdi jyrlaý úshin kelgenmin» aıdarymen bastaý alǵan poezııa keshi, «Muqaǵalı – máńgilik ǵumyr» kitap kórmesine ulasty. О́rimdeı órender aqyn jyryn alma kezek jatqa oqyp, jyr estafetasyna kitaphananyń egde oqyrmandary da ún qosty.
Jazýshylar kitaphanasynda ótken «Jyr dúldúli – Muqaǵalı» ádebı-sazdy keshine Jazýshylar odaǵy balalar ádebıeti keńesiniń tóraǵasy Nurdáýlet Aqysh bastaǵan qalamgerler qatysyp, Muqaǵalıdyń jaýhar jyrlary jyl ótken saıyn qarańǵy tún qoınaýynan sáýlesin shashqan jaryq juldyzdaı jarqyrap, aıshyqtala beretinin, óskeleń urpaq tárbıesinde aqyn murasynyń róli basym ekenin aıtty.
Naýryzbaı aýdany Otbasylyq oqý kitaphanasynda saltanat qurǵan «Ár óleńi – bir álem» jobasy da án men jyr terbegen jyly júzdesý retinde este qaldy. Mektep shákirtteri men stýdentter Muqaǵalı kúndelikterinen úzindi oqyp, aqynnyń ómir tynysyn beıneleıtin sahnalyq qoıylymdaryn kópshilik nazaryna usyndy. «Aqyn murasy, marjan poezııasy – máńgilik, bolashaq urpaqtyń enshisi, qasterlep qadirleıtin qazynasy... Bizdiń ujymǵa qarasty barlyq kitaphanalarda ótken sharalardyń negizgi maqsaty – Muqaǵalı murasy arqyly oqýshylardy ásemdikke, eljandylyqqa tárbıeleı otyryp, poezııa áleminiń syryn ashý. Bul jobalar jyl saıyn úzbeı ótip turady, – deıdi Almaty qalasynyń Ortalyqtandyrylǵan kitaphana júıesiniń dırektory Rýzanna Bektursynova.
Qazaqstan Jazýshylary kitaphanasynyń meńgerýshisi Elena Aǵaısa: «Muqaǵalı shyǵarmalaryna arnalǵan sharalarǵa qatysý úshin oqyrmandy úgittep jatýdyń qajeti joq. Aqynnyń óleńderi magnıt sekildi, kitaphanaǵa kezdeısoq kelgen oqyrmannyń ózi is-sharanyń ishine enip, jyr oqyǵysy kelip turady», dep tebirendi.
ALMATY
