Ońtústik Koreıa prezıdentiniń sapary barysynda birqatar memorandýmǵa qol qoıyldy

ASTANA. 19 maýsym. Ońtústik Koreıa basshysynyń memleketimizge sapary sheńberinde eki el úkimetteri arasynda birneshe mańyzdy qujattarǵa qol qoıyldy. Bul týraly «QazAqparat» habarlady. Naqtylaı aıtqanda,  «Balqash JES» aksıonerlik qoǵamy basqarmasynyń tóraǵasy Sýk Von Kım men KEGOC aksıonerlik qoǵamynyń basqarma tóraǵasy Baqytjan Qajıev jańadan iske qosylatyn óndirýshi qondyrǵylardyń elektr qýatyn ázirlikte ustap turýǵa qatysty kórsetiletin qyzmetti satyp alýǵa arnalǵan uzaqmerzimdi shartqa qol qoıdy. Budan bólek, Ádilet mınıstrligi men Koreıa Respýblıkasy memlekettik zańnama mınıstrligi arasynda,  sondaı-aq, Bilim jáne ǵylym mınıstrligi men Koreıanyń Ǵylymı aqparattyq-komýnıkasııalyq tehnologııalar jáne ǵylymı-tehnıkalyq qyzmet salasyndaǵy ózara túsinistik týraly memorandýmdarǵa qol qoıyldy. Sonymen qatar, Qorshaǵan orta jáne sý resýrstary mınıstrligi men Koreıanyń Orman sharýashylyǵy qyzmeti arasynda ózara yntymaqtastyqqa negizdelgen memorandým bekitildi. Joldybaı Bazar. Derekkóz: «QazAqparat». Foto: mgorod.kz.