ASTANA. 20 maýsym. Búgin maýsymnyń 20-na qaraǵan túni Brazılııanyń astanasy – Brazılıa qalasyndaǵy ulttyq stadıonda S tobyndaǵy Kolýmbııa jáne Kot-d`Ivýar quramalary ekinshi týrdyń oıynyn ótkizdi. Match 2:1 esebimen amerıkalyqtardyń paıdasyna sheshildi. Bul týraly egemen.kz habarlady.
Kolýmbııa - Kot-d`Ivýar 2:1 (0:0).
19 maýsym. Brazılıa. Ulttyq stadıon. Tóreshi - Hovard Ýebb (Anglııa).
Kolýmbııa: Davıd Ospına, Hýan Sýnıga, Krıstıan Sapata, Marıo Iepes, Pablo Armero (Santıago Arıas, 72), Abel Agılar (Aleks Mehııa, 79), Karlos Sanches, Hýan Kýadrado, Hames Rodrıges, Vıktor Ibarbo (Hýan Kıntero, 53), Teofılo Gýterres.
Kot-d`Ivýar: Býbakar Barrı, Serj Ore, Dıde Zokora, Sýleıman Bamba, Artýr Boka, Sere De (Matıs Bollı, 73), Sheık Tıote, Jervıno, Iаıa Týre, Maks Gradel (Salomon Kalý, 67), Vılfrıd Bonı (Dıde Drogba, 60).
Goldar: Hames Rodrıges (64), Hýan Kıntero (70), Jervıno (73).
Eskertýler: Dıde Zokora (55), Sheık Tıote (90).
Bul kúni osynyń aldynda jeńis toıyn toılaǵan eki komanda ushyrasty. Ońtústik Amerıka qurlyǵynyń ókilderi Grekııa quramasyn óte senimmen (3:0) utyp shyqsa, afrıkalyqtar japondardy 2:1 etip súrindirdi. Býkmekerler osy matchtyń aldynda kolýmbııalyqtardyń azdaǵan basymdyqpen favorıt bolatynyn aıtqan eken. Túptiń túbinde ózi de solaı bolyp shyqty. Al bul matchtyń jeńimpazdary is júzinde kelesi kezeńge shyǵatyn edi.
Ár taımnyń ártúrli kórinis bergenine qaramastan, oıyn jurttyń kútken deńgeıinen tabyldy. Úziliske deıin shyn máninde eki komandada da gol soǵatyndaı múmkindik bolǵan joq. Eń bir qolaıly sátti Hames Rodrıges jetkizgen dopty qaqpaǵa týra baǵyttaı almaǵan Teofılo Gýterres jiberip aldy.
Ekinshi taımnyń basy týra birinshi bóliktegideı joǵary qarqynmen bastaldy. Muny, ásirese, Kolýmbııa quramasy kóbirek ustandy. 58-mınýtta Hýan Kýadrado dopty qıys buryshtan uryp, qaqpa baǵanyna tıgizdi. Kóp uzamaı «kofeshiler» bul basymdylyqtaryn golǵa aınaldyra bildi. Dop buryshtamada berilgende, aıyp alańy ishinde bolǵan talasta Rodrıges janyndaǵy Dıde Dorgbadan buryn qımyldap, ony basymen qaqpaǵa baǵyttap úlgerdi. Arada 6 mınýt ýaqyt ótkende, álgindegi Rodrıges qarsy bette dopqa qol jetkizip, kezekti keń qanatty shabýyldy bastap berdi. Onyń aıaǵynan jetken dopty oıynǵa endi qosylǵan Hýan Kıntero qaqpaǵa dál uryp túsirdi. Esep osylaısha demde 2:0-ge jetti.
Biraq bul ıvýarlyqtardyń eńsesin qatty túsire qoımaǵan sııaqty. Muny osydan keıin olardyń birneshe ret tegeýrindi shabýyl uıymdastyrýlary baıqatty. Sondaı jigerli joryqtardyń birin ózi bastaǵan Jervıne sol qaptalmen atylyp shyǵyp, jolaı birneshe básekelesin oraǵytyp ótti. Sosyn aıyp alańynyń ishine kirdi de, birden qaqpashynnyń oń jaǵyn ala urdy. Gol! Ol osylaısha Rodrıges syndy osy týrnırdegi goly sanyn ekeýge jetkizdi. Italıannyń «Roma» komandasynyń shabýylshysy osy arqyly atyn tarıhqa engizdi – osy kezge deıin Kot-d`Ivýar quramasynyń birde-bir oıynshysy álem chempıonatynda eki oıyn qatarynan gol soǵyp kórmegen eken.
Osy doptan keıin «pilder» oıynnyń qalǵan ýaqytynda qarsy qaqpa jaqtan shyqpaı qoıdy. Alaıda, sol tolassyz shabýyldardan tıisti nátıje shyǵara almady.
Damır Qojamqul.
Derekkóz: Chempıonat.Rý.
Foto: Sportbox.ru.
