Kompanııanyń quryltaıshysy Ivan Saýer Memleket basshysyna ósimdikterdi zııankesterden qorǵaıtyn zattar, pestısıdter, kalıı tuzy jáne quramynda glıfosaty bar preparattar shyǵaratyn óndiris jelisi men zamanaýı qural-jabdyqtardy kórsetti. Zaýyt álemdik standarttarǵa saı jáne ekologııalyq, óndiristik, sanıtarlyq qaýipsizdiktiń barlyq normasy men talabyn eskere otyryp salynǵan. Byltyr kásiporyn somasy 41 mıllıard teńge bolatyn 7 myń tonna ósimdikterdi qorǵaıtyn hımııalyq zat shyǵarǵan.
Sonymen qatar Stepnogorsk qalasyndaǵy kompanııanyń akkredıtasııadan ótken halyqaralyq óndiristik-ǵylymı zerthanasy bar.
Kásiporyndy aralap kórý barysynda Memleket basshysyna Aqmola oblysynyń ákimi Ermek Marjyqpaev óńirdiń áleýmettik-ekonomıkalyq damýy men júzege asyrylyp jatqan ınvestısııalyq jobalary jóninde baıandady. Prezıdentke hımııa jáne óńdeý ónerkásibi salasynyń, metallýrgııanyń, jeńil jáne tamaq ónerkásibiniń jaı-kúıi jóninde málimet berildi.
Qasym-Jomart Toqaev Aqmola oblysynda óndiriletin ónimder kórmesin aralap kórip, iri kásiporyndardyń basshylarymen óńir ekonomıkasyn odan ári damytýdyń ózekti máselelerin jáne perspektıvalaryn talqylady.
