Atap aıtqanda, Aıagóz aýdanynyń Tarbaǵataı aýylynyń kári-jasy alys-jaqyndaǵy tamyr-tanys, aǵaıyn-týysymen tildesý úshin ákimdik pen mádenıet úıi, kitaphana mingese ornalasqan qos qabatty ǵımaratqa keletini kúndelikti ádet bolyp ketken. Ásirese, О́skemen men Semeıdegi joǵary oqý ornynda oqıtyn osy aýyldyń stýdent jastary onlaın oqý tapsyrmalaryn oryndaýda qınalyp júr. Aýyl ákimi Erbol Erejepov zaman talabyna sáıkes baılanys túrin ornatýǵa baryn salyp júrgenimen, ınternet aýyl halqynyń basty armany bolyp turǵanyn aıtady.
– Tarbaǵataı aýyldyq okrýginiń quramynda aýyldan ózge úsh eldi meken bar. Aldymen turǵyn sanyn aıtar bolsaq, Aqshoqy aýylynda – 44, Ortaaralda 47 adam turady. Maltúgelde 180 adam bar. Osylardy eskere kelsek, Tarbaǵataı aýyly boıynsha jalpy 1 500 shamasynda turǵyny bar Aıagóz aýdanyndaǵy iri aýyl dep aıtýǵa bolady. Negizinen tirshilik kózi – mal ustaý, iri sharýa qojalyqtary da az emes. Aýyl azamattarynyń yntymaǵyna, halyqqa ortaq is bolsa, jumyla kirisetinine esh kúmán joq. Ár jyldyń túlekteri de aýyl úshin qajetti máselelerdi sheshýge belsene úles qosady. Degenmen ınternet baılanysynyń nasharlyǵy bárimizdi tolǵantyp otyr. 2007-2008 jyldary «Activ» kompanııasy baılanys jelisin ornatqan bolatyn. 2012-2013 jyldary halyqtyń ótinishine baılanysty «Beeline» júıesi iske qosyldy. Biraq 2019 jyldan bastap, Tarbaǵataı aýmaǵy turǵyndaryn ınternetpen tolyqtaı qamtamasyz etý maqsatynda «Qazaqtelekom» AQ burynǵy «Activ» kompanııasynyń jeli tartý baǵanyn alyp, ornyna jańadan óz baǵanyn ornatty. Sol arqyly «Tele2», «ALTEL» jáne «Activ» úsheýin qatar qoıdy. Mine, sol ýaqyttan beri ınternet baılanysynyń qyzmeti nasharlap ketti. Aýyl turǵyndary negizinen «Activ» nomerin paıdalanatyn. Qazir atalǵan baılanys túriniń operatory durys jumys istemeı, halyqqa qıyn tıip otyr. Buǵan qatysty atalǵan kompanııa basshylyǵyna joldaǵan hattarymyzǵa ázirge jaýap joq. Bıyl aýylymyzdyń tóńireginde «Tele2» kompanııasy úsh jeli baǵanyn ornatýdy qolǵa alyp otyr. Byltyr jyl sońynda jaı bastady. Isterin durys aıaqtaıdy dep úmittenemiz. Ázirge aýyl turǵyndary ákimdiktiń WiFi jelisine kelip, baılanysqa shyǵyp otyr. Basqa amaldary joq, – deıdi aýyl ákimi E.Shákeruly.
Aýyl ákimi beker aıtpapty. Mádenıet úıiniń jaıymen tanysý úshin ústińgi qabatqa kóterilgenimizde dálizdegi terezeniń aldyna kep qarmaq salyp, balyq aýlap turǵandaı keıiptegi úsh bozbalaǵa kózim tústi. Jón surastyrsaq, stýdentter eken. О́skemendegi ShQTÝ-da oqıtyn Dýman Áskerjanov aýylǵa jeltoqsan aıynda kelipti. Sodan beri osy ǵımarattyń bosaǵasynan attaý onyń kúndelikti ádetine aınalǵan. О́ıtkeni stýdenttik eseptik qujattardy uıaly telefonnyń ınterneti arqyly joldap otyrýdyń basqa joly joq. Bir qyzyǵy, ol baǵdarlamashy mamandyǵy boıynsha bilim alyp jatyr eken. Alaıda aýylǵa oralǵysy kelmeıtinin, keleshekte qalada qalǵysy keletinin de jasyrmady. «Bul másele – tek bizdiń aýyldyń emes, búkil Qazaqstannyń áli kúnge deıin sheshimin tappaı kele jatqan ortaq problemasy. Ázirge osylaı baılanysqa shyqqanymyzǵa da táýbe» deımiz, deıdi ol.
Sátjan QASYMJANULY
Abaı oblysy,
Aıagóz aýdany
