Qostanaı oblysynyń Aýyl sharýashylyǵy jáne jer qatynastary basqarmasynyń bastyǵy Tımýr Bısimbaev 2023 jylǵa arnalǵan josparlary týraly aıtyp berdi. Onyń aıtýynsha, 2022 jyldan keıin jem-shóp daqyldarynyń egis alqaptaryn ulǵaıtý jáne ınvestısııalyq jobalardy engizý esebinen mal men qustyń barlyq túrleriniń sanyn kóbeıtý boıynsha úlken jumys júrgizý josparlanǵan. Josparlarǵa sáıkes, bul sharalardyń barlyǵy 2023 jyly et, sút, jumyrtqa jáne mal sharýashylyǵy ónimderin óndirýdi 103 paıyzdan astamǵa arttyrýy tıis.
«Oblystyń 11 aýdanynda 23 sút ónimderi fermasyn salý josparlanýda. Investısııalardyń jalpy kólemi 99,7 mlrd teńgeni quraıdy. 17 530 bas asyl tuqymdy iri qara mal satyp alynady. Al sút óndirisi 143,7 myń tonnany quraıdy. Osy jobalardy iske asyrý boıynsha sıyrlardyń sany 7,5 paıyzǵa nemese 250,5 myń basqa artady, sút óndirý kólemi 30 paıyzǵa nemese 564,1 myń tonnaǵa artady. Sút óńdeý kásiporyndarynyń júktemesi 70 paıyzdan 80 paıyzǵa deıin artady», dedi Bısimbaev.
Qazir mal ósirýmen aınalysatyn 60 ferma bar. Olardyń tek 12-si iri sharýashylyq. О́ńirdegi sút óńdeý kásiporyndary halyqtyń sút ónimderine degen qajettiliginiń 87 paıyzyn qamtamasyz etedi.
Bısimbaev sondaı-aq halyqty áleýmettik mańyzy bar azyq-túlikpen qamtamasyz etý taqyrybyna jeke toqtaldy. Qazirgi ýaqytta turaqtandyrý qorynda jalpy somasy 2,7 mlrd teńgege 15 myń tonna kóleminde 14 mańyzy bar azyq-túlikti qamtıtyn qor bar.
Jalpy 2023 jyldan 2026 jylǵa deıingi kezeńde 145 ınvestısııalyq jobanyń jospary qurylǵan.
