Eńbek jáne halyqty áleýmettik qorǵaý mınıstrliginiń ókili halyqty jumyspen qamtý máselelerindegi ózgerister týraly parlamentshilerge aıtyp berdi. Ol mınıstrlik jumyspen qamtýǵa járdemdesý qyzmetterin kórsetýdiń jalpy túrinen ataýly toptamalyq sharalaryna kóshý jóninde jumys júrgizip jatqanyn habarlady.
Senat depýtattary zań jobasyn talqylaý barysynda NEET jastardy jumyspen qamtý, múgedektigi bar adamdardy jumysqa ornalastyrý, áleýmettik kásipkerlikti damytý jáne t.b. máselelerge nazar aýdardy.
Senator Aqmaral Álnazarova jastardyń tájirıbeden ótý salasyndaǵy problemalardy sheshý qajettigin atap ótti, al depýtat Lázzat Qaltaeva Áleýmettik kodekste aýyldyq óńirlerde jumyspen qamtýdy qamtamasyz etýge basa kóńil bólýdi usyndy.
«Salalyq mınıstrlik mobıldi jumyspen qamtý boıynsha aýqymdy jumys júrgizýi tıis. Biz bul sharalardy tıimdi etý úshin mundaı qyzmetti habardar etý turǵysynan bastaý qajet dep sanaımyz», dedi Lázzat Qaltaeva.
Ol úshin salalyq mekemeler birqatar jobany iske asyrýdy josparlap otyr. Jobalar qatarynda mobıldi jumyspen qamtý ortalyqtary, jyljymaly bos oryndar jármeńkeleri jáne t. b. sharalar bar.
Senator Bıbigúl Jeksenbaıdyń aıtýynsha, aqparattyq-túsindirý jumystaryn aldyn ala júrgizýge basa kóńil bólý qajet. Sonda mobıldi jumyspen qamtý ortalyqtary qamtıtyn halqy az aýdandardyń turǵyndary tolyq habardar bolady.
Sonymen qatar senatorlar men kezdesýge qatysýshylar jumyspen qamtýdyń jańa ıkemdi nysandaryn zańnamalyq retteýge qatysty ózgerister men tolyqtyrýlardy da talqylady. Atap aıtqanda, birlesken jumys, ıaǵnı bir jumys ornynda eki jumyspen qamtylǵan, qatar jumyspen qamtylǵan, ıaǵnı eki jumys ornynda bir qyzmetker, sondaı-aq jyljymaly keste sııaqty jumyspen qamtý túrleri de engiziletin bolady.
Bul Áleýmettik kodeksti jetildirý boıynsha jumys tobynyń úshinshi kezdesýi. Qatysýshylar ótken eki kezdesýde balalardyń quqyqtary men múddelerin qorǵaýǵa, zeınetaqy júıesin jetildirýge, ataýly áleýmettik kómek alýǵa qatysty máselelerdi pysyqtaǵan bolatyn.
