Sýretti túsirgen Túgelbaı BISEN
Mıra Elekesheva Oral qalasyndaǵy joǵary oqý oryndarynyń birinde sabaq beredi. О́zi kóp jyldan beri oraldyq «Aqjaıyq» komandasyna jankúıer bolyp, óz alańynda ótken oıyndaryn qur jibermeıdi. Tipti stýdentterin ertip kelip, alańdaǵy oıynshylarǵa qyzý qoldaý kórsetip júredi. Ásirese komanda quramynda jergilikti jastardyń bolǵanyn jaqsy kóredi. Osyndaı jankúıerin komanda músheleri de ábden tanyp alǵan.
Jaqynda, aqpannyń 7-si kúni Mıra oqystan jol apatyna túsip qaldy. Aýyr jaraqat alyp, qoly synǵan oǵan dárigerler 9 aqpan kúni ota jasady. Muny estigen «Aqjaıyq» komandasynyń oıynshylary Rysbek Qońyrov, Samat Berdáýletov, Rýslan Haırov, Baýyrjan Omarov jáne Meıram Sapanov aýrýhanaǵa arnaıy kelip, Mıramen kezdesti.
– Súıikti komandamyzdyń jankúıerleri bir úıdiń balasyndaı bolyp ketkenbiz ǵoı. Árdaıym ózara jaǵdaı surasyp turatynbyz. Aýrýhanada jatqanymda Nuraly esimdi dosym habarlasyp, palatadan tómenge túsýimdi ótindi. Sálem-saýqat qabyldaý ornyna barsam, súıikti komandamnyń oıynshylary kelip tur eken. Qatty tańǵalyp ári qýanǵanymnan júregim jaryla jazdady. Maýsym barysynda biz fýtbolshylardy qoldasaq, osyndaı qıyn jaǵdaıǵa tap bolǵanda oıynshylar meni izdep kelipti. Qatty qýandym, – deıdi Mıra Elekesheva.
Fýtbolshylar qur qol kelmepti. Jankúıerge Meıram Sapanov oıyn jeıdesin syılasa, Baýyrjan Omarov jankúıer sharfyn tartý etti. Olar Mıranyń tezirek jazylyp shyǵýyna tilek bildirdi.
Batys Qazaqstan oblysy
