Saltanatty is-sharaǵa Qazaqstan boks federasııasynyń prezıdenti Keńes Raqyshev, QBF atqarýshy dırektory Maratbek Myqtybekov, Almaty qalasy boks federasııasynyń basshysy Erjan Qosmambetov jáne QBF prezıdentiniń keńesshisi Baǵlan Shalaev qatysty.
«Ispanııada elimizdiń jastar quramasy jaqsy nátıje kórsetti. Medaldardyń sany men sapasy boıynsha bizdiń qurama úzdikter qatarynan kórinip, úshinshi orynǵa ıe boldy. Arada kóp ýaqyt ótse de, jas boksshylarymyzdy umytqan joqpyz. Biz jastarǵa senim artamyz. Bolashaqta olar ulttyq qurama boksshylarynyń ornyn basady. Ásirese áıelder boksyndaǵy nátıjeler erekshe qýantady. Boks – qazaqtyń ulttyq sportyna aınaldy. Qazir áýesqoı boksta júrip te atyńdy shyǵarýǵa bolady. Jaqsy qarajat ta taba alasyń. Qazaqstannyń kásipqoı boksshylary mundaı tabysqa kenelmeıdi desem, qatelespeımin. Barlyq boksshylarǵa, bapkerler quramyna jáne bizdiń jeńisterimizdiń jarshysy – BAQ ókilderine alǵys aıtamyn», dedi Keńes Raqyshev óziniń quttyqtaý sózinde.
Federasııa prezıdenti álem chempıondary – Elına Bazarova (54 kg) men Baqyt Seıdishke (66 kg) 3 mıllıon teńgeniń sertıfıkattaryn tabystady. Kúmis júldegerler – Nurbek Mýrsal (67 kg) men Dáýlet Tólemisov (75 kg) 1,5 mıllıon, qola júldegerler – Gúlnaz Bóribaeva (48 kg), Ásem Tańatar (63 kg) jáne Ásel Toqtasyn (+81 kg) 1 mıllıon teńgege ıe boldy. Jeńimpazdardyń jeke bapkerleri Nurbota Seıitbek pen Baǵlan Omarbekovke 500 myń teńgeden berildi. Mundaı marapattar jastar quramasynyń basqa da bapkerlerin yntalandyra túsedi.
Jastar arasyndaǵy álem chempıonatynyń jalpykomandalyq esebinde Qazaqstan quramasy Ulybrıtanııamen birge úshinshi oryndy bólisken bolatyn. Úndistan ekinshi orynǵa ıe bolsa, О́zbekstan álem chempıonatynyń úzdik quramasy atanǵan-dy.
