Qoıýshy horeograf Patrık de Bana óz qoıylymdaryna árkez oralǵan saıyn oǵan mindetti túrde ózgeris engizedi eken. Keýdesinde ylǵı jandúnıesinen bulqynyp shyqqan týyndysy tolyqqandy ómir súrsin degen úlken qushtarlyq turady.
–Ýaqyt alǵa jyljyp, bıshiler aýysady, soǵan saı horeografııany jańartýdyń qajettiligi týady. Biz burynǵydaı eki aktini qaldyrdyq. Biraq balet trýppasynyń kórkemdik jetekshisi Altynaı Asylmuratovamen birge qoıylymdy sál qysqa ári yqsham etip jasaýdy uıǵardyq, – dedi Patrık de Bana. – Úsh jyl buryn premera úlken tabysqa ıe bolǵan edi, buǵan qýanyshtymyn. Álbette, osynaý baletti barynsha kóp adamnyń kórgenin, onyń ishinde gastrol aıasynda sheteldikterdiń de tamashalaǵanyn qalar edim. О́ıtkeni spektakl Qazaqstandy tanystyrady, osy eldiń ásemdigin jyrlaıdy, – deıdi baletmeıster.
Eske sala keteıik, spektakldi bezendirýmen sheteldik talantty sheberler – dekorasııalar boıynsha sýretshi Rıkardo Sanchez Kýerda men kostıýmder boıynsha sýretshi Stefanı Baýerle aınalysty. Ssenograf ulttyq stıldiń ásem elementterin baıqap, qazaq dalasynyń keńdiginen shabyt alyp, sahna jabdyǵyn birinshi aktide ádemi tabıǵat jáne kesene kartınalarymen shynaıy etip bezendirgen. Al ekinshi aktide sahna keleshekti boljaıtyndaı bolyp kórinedi. Sýretshi Stefanı Baýerle janýar-keıipkerler men baqsyǵa arnap olardyń beınesin bir qaraǵanda kóz aldyńa ákeletin kostıýmder jasady.
Sondaı-aq qalanyń nobaıyn salý kórinisinde jáne shabadandarmen bolatyn áıgili oqıǵadaǵy qyzdar kostıýmderiniń boıaýy qanyq. Ulttyq kostıýmderdiń de nobaıy bólek.
Patrık de Bana bul balettiń álemdik sahnalar qatarynan úılesimdi oryn alatynyn atap ótti.
– Parıj operasyna nemese londondyq Kovent-Gardenge gastrolge baryp kelgen qolaıly bolar edi, bul – úlken teatrlar, olarda osy dekorasııalarǵa oryn jeterlik, – dedi horeograf.
Desek te bul balet túrli sahnalarǵa kele beredi. Parıj ben Londondaǵy kórermenderge ǵana emes, barsha álemge ortaq taqyryp. Qoıylymnyń negizgi jelisi ómirlik qundylyqtar men eshqashan ózgermeıtin ádilet, ar syndy qasań qaǵıdalarǵa qurylǵan. Soǵan qosa rýhanı, mádenı izgiliktermen qatar áýezdi mýzyka men ulttyq naqyshtyń birge tolqýy baletti óńdendire túsedi.
Sonymen balettiń mýzykalyq negizinde Tólegen Mombekov, Qýat Shildebaev, Renat Gaısın, Karlos Pıno-Kıntananyń týyndylary, odan bólek «Turan», «Hassaq» folklorlyq-etnografııalyq ansamblderi men «Steppe Sons» etno-djaz tobynyń repertýaryndaǵy kompozısııalary bar.
Balet ónerinde mýzykanyń róli úlken. Bıshiniń ár qımyly áýenniń ár notasymen ishteı qabysyp, úndesip jatady. «Dala úni» qoıylymynda Ul/Sheberdiń partııasyn oryndaýǵa Ǵalymjan Nurmuhamet pen Bekzat Orynbaev daıyndalyp jatyr. Al Mýza – Áıgerim Beketaeva men Anastasııa Zaklınskaıa. Baqsy – Sultanbek Ǵumar, Serik Naqyspekov. Ana – Ásel Shaıkenova, Adelına Tólepova, Ánel Rústemova. Áke – Oljas Tarlanov, Jánibek Ahmedıev, Jánibek Imanqulov. Qarsylas – Evgenıı Rybkın, Dıas Qurmanǵazy, Oleg Leontev, Suńǵat Qydyrbaı jáne taǵy basqalary. Lıbrettonyń horeografııalyq adaptasııasyn Jan-Fransýa Vazel jasaǵan.
