Ásirese, demikpe, júrek jáne dıabet aýrýlaryna shaldyqqan naýqastardyń preparattary ýaqytynda qoldaryna tımeı, biraz adam qajetti dárini dárihanalardan óz qarajatyna satyp alǵan. Al óńirlik densaýlyq saqtaý basqarmasynyń ókilderi jergilikti medısınalyq uıymdardyń dárihanalarynda arnaıy tizimge engen preparattardyń jalpy somasy mlrd teńgeden asatyn kólemi bar, jyl basynan tegin dári-dármekke baılanysty shaǵym túsken joq dep otyr. Bul jaǵdaıǵa ádette jyldyń basy men aıaǵynda oryn alatyn tehnıkalyq aqaýlar sebep bolýy múmkin degen ýáj aıtady.
Aqpan aıynyń basyndaǵy derekterge súıensek, «Dári-dármekpen qamtamasyz etýdiń aqparattyq júıesinde» jalpy somasy 153,3 mln teńge turatyn dárilik preparattar aq jeleńdilermen jazylyp, naýqastarǵa taratylǵany tirkelgen. Emdeý uıymdarynyń dárihanalarynda áli de jalpy quny 1,2 mlrd teńgeniń dári-dármegi qalyp otyr. Densaýlyq saqtaý basqarmasyndaǵylar óńirdegi emhanalar 505 ataýdan turatyn dári-dármekke ótinim bildirgenin, onyń 450 túri satyp alynyp qoıǵanyn málimdedi. Qalǵan bóligi jýyq arada jaýapty dıstrıbıýtorlar arqyly jetkiziledi.
Pavlodardaǵy №2 emhana bas dárigeriniń orynbasary Elena Kııatkına 10 myńǵa jýyq emdelýshi dıspanserlik esepte tur, onyń basym bóligine byltyrǵy jyldyń jeltoqsan aıynda eki aıǵa jetetindeı dárilik zattar berilgen deıdi. Al qańtar aıynda mekemede qaıta qurylymdaý úderisteri júzege asyp, dári-dármekti jazyp beretin aqparattyq júıede máseleler týyndaǵan.
– Bolmaǵan soń biz naýqastarǵa tegin dárilerdiń tirkelimin qaǵazǵa shyǵaryp berdik. Keıbir adamdar resept bermeı otyrsyńdar dep shaǵym aıtyp keldi. Ol jaǵdaı tehnıkalyq sıpatqa ıe ekenin túsindirip baqtyq. Aqpan aıynan beri másele sheshilip, resept jazyp berý ornyna keldi. Qazir jeńildikti preparattar qolymyzda bar, jetkizý boıynsha máseleler joq, – deıdi ol.
«SQ «Farmasııa» JShS óńirlik fılıalynyń jetekshisi Aıagóz Aıtbaeva biryńǵaı dıstrıbıýtormen qajetti medısınalyq preparattar aldyn ala satyp alynyp, belgilengen merzimnen buryn oblysqa jetkizilip qoıatynyn aıtady. Bıylǵa qajet dárilik zattar 2022 jyldyń sońynda qoımalarǵa salynypty. Jergilikti medısınalyq uıymdar dári-dármek túrleri men sanyn ózderi aıqyndap, jetkizý kestesin derbes belgileıtin kórinedi. Sondyqtan óńirlik jetkizýshi kompanııanyń qyzmetinde min joq dep maqtandy ol. Biryńǵaı dıstrıbıýtordyń preparattar tizbesine 1 765 ataý enedi. Preparattar uıymdarǵa turaqty túrde jetkizilip, ári qaraı stasıonarlar men ambýlatorııalarǵa jol tartady. Eger áldebir dárilerdi shuǵyl túrde aparý qajet bolsa, seriktestik oǵan da árdaıym daıyn ekenin eskertti.
Oblys ortalyǵyndaǵy №5 emhana da 190 mln teńgeniń dári-dármegin alyp úlgergen. Bul kólem shamamen 3 aıǵa deıin jetedi eken. Uıym ishindegi dárihana kúnine 300-den asa naýqasty nozologııa, arterııalyq gıpertenzııa, júrektiń ıshemııalyq aýrýy, qant dıabeti, orfandyq (sırek kezdesetin) jáne ózge de aýrýlar boıynsha preparattarmen qamtamasyz etip otyr.
PAVLODAR
