Taıaýda qylqalam sheberi ónersúıer qaýymǵa saýyn aıtyp, «Qazaq óneriniń Túrkııaǵa kómegi» aksııasyna qatysýǵa úndeý jarııalaǵan bolatyn. Buǵan ún qosqandar tabyldy. Sóıtip, sýretshiniń «Umaı ana» kartınasy 10 mıllıon teńgege satylyp, búkil qarajat Túrkııa elshiligi ashqan arnaıy qorǵa aýdaryldy. Osy máseleniń anyq-qanyǵyn bilmek úshin Erbolat Tólepbaı myrzanyń ózine habarlasqan edik. «Jarııalanǵan úndeýden keıin aýksıon máselesimen aınalystym. Árıne, jedel arada úlken kólemde mundaı is-shara uıymdastyrý kóp ýaqytty qajet etedi. Sebebi bul ońaı jumys emes.
О́ıtkeni onymen aınalysatyn arnaıy kompanııalar bar, olardyń kestesine saı kelý, ustanǵan saıasatymen úndes shyǵý, adam jınaý, jarnama jasaý sekildi máseleler týyndady.
Sondyqtan jaqyn týystaryma, jora-joldastaryma saýyn aıtyp, úndeý tastadym. Týysqandyq, aǵaıyndyq, joldastyq kóńilimizdi bildirdik. Úlken aýksıondy kútkenshe birshama ýaqyt ótip ketedi. Al qazirgideı qıyn kezeńde Túrkııa tarapy qyrýar qarajatqa muqtaj. Jaǵdaı qıyn. Sol sebepti jedel aýksıon uıymdastyrdym. Oǵan negizinen Qanat Tólemetov bastaǵan bes jigit atsalysty. Rústem Qaraev, Erjan Omarov, Vıtalıı Kım, Azamat Syrǵabaev sekildi atymtaı jomarttar bul usynysty qostady», deıdi E.Tólepbaı.
Sýretshiniń bul qadamy túsinikti. О́ıtkeni Túrkııadaǵy apattan halyqty qutqarý – ýaqyt kútpeıtin másele. Qutqarýshylar qazir kún sanap emes, saǵat sanap adam ómiri úshin kúresip jatyr. Osyndaı kúrdeli kezeńde Anadolydaǵy aǵaıynǵa berilgen árbir tıyn mańyzdy. Osylaısha, jedel ótkizilgen aýksıonǵa qylqalam sheberiniń «Umaı ana» kartınasy qoıylypty.
«Bul óte sapaly salynǵan birtýar shyǵarmamnyń biri edi. Atymtaı jomart bes jigit qosylyp, aýksıon kezinde kartınany 10 mıllıon teńgege baǵalady. Onyń qorytyndysy shyqqannan keıin qarajatty kimge tapsyrý kerek degen másele týyndady. Sóıtip, Túrkııanyń Almatydaǵy bas konsýldyǵyna habarlastyq. Túrik baýyrlarymyz bizdi arnaıy qabyldady. Negizi satylǵan kartına bireý ǵana. Ony bes jigit bólip alýy kerek. Olar aqyldasa kele shyǵarmany da Túrkııa tarapyna syılyq retinde tapsyrýǵa sheshim qabyldady. Sóıtip, kezdesý barysynda 10 mıllıon teńgeni Túrkııadaǵy apattan zardap shekken baýyrlarymyzǵa kómek retinde aýdardyq. «Umaı ana» kartınasyn da tabystadyq.
Bas konsýlmen kezdesý kezinde Anadolydaǵy aǵaıynǵa kóńilimizdi bildirdik. О́ner adamdary, sýretshiler mundaı qıyn kezeńde shette qala almaıdy. Árdaıym baýyrlas ekenimizdi bildiremiz. Qolymyzdan kelgen kómegimizdi kórsetetinimizdi jetkizdik. Konsýldyqtaǵy jigitter bul qadamymyzdy jyly qabyldady. Kóńili bosap, alǵysyn aıtty», deıdi E.Tólepbaı.
«Umaı ana» kartınasynda kóneden kele jatqan analarymyz beınelengen. Qolynda jas sábıdi kóterip tur. Qylqalam sheberiniń aıtýynsha, bul shyǵarmany syılaýdyń rámizdik máni bar. Qazaqtar da, túrikter de erte zamanda bir anadan paıda bolǵan. Sondyqtan bala ustap turǵan Umaı ananyń kartınasyn jańarǵan Túrkııanyń rámizine aınalsyn degen tilekpen tapsyrǵan kórinedi.
