Jádiger • 16 Aqpan, 2023

Qaıta oralǵan qobyz

1020 ret

kórsetildi

1 mın

oqý úshin

Bul qylqobyz búginde Ulttyq mýzeıdiń qorynda tur. Bir qaraǵanda kózimiz úırengen ulttyq aspap bolǵanymen, tarıhy tereńde jatyr. Tipti dál osy murajaıǵa kelý joly da shytyrmanǵa toly. Qatardaǵy bir qobyz emes, Amerıkany aralap kelgen qobyz.

Marjan ÁBISh

Qazaqstannyń Amerıka Qurama Shtattaryndaǵy elshiliginiń ókili elimizdiń Ulttyq mýzeıine qundy XVIII ǵasyrda jasalǵan qobyzdy tapsyrdy.

Atalǵan mýzeıdiń baspasóz hatshysy Aıgúl Aıtmuhanovanyń aıtýynsha, aspapty 1996 jyly Qazaqstannan amerıkalyq tarıhshy, sazger, Vashıngtonda Ortalyq Azııa jáne Kavkaz ınstıtýtynyń negizin qalaǵan Frederık Starr alyp ketken eken.

Ol qylqobyzdy keshegi 90-jyldardyń qubylmaly kezeńinde Qazaqstannyń ońtústigine saıahattap, Taraz qalasynan oljalaǵan. Eldegi kúrdeli ekonomıkalyq ahýalǵa baılanysty qobyzdyń qart ıesi úıindegi jádigerdi satýǵa muqtaj bolypty. Jalpy, qylqobyz ár úıden tabyla bermeıtin kıeli aspap emes pe? Úsh ǵasyr buryn jasalǵan qundy dúnıeniń beımálim qarııada bolýy da tegin emes. Bálkı, óziniń nemese otbasynyń ónerge qatysy bar shyǵar.

Satyp alǵan tarıhshy oǵan qobyzdy qaıtse de Qazaqstanǵa qaıtaratynyna ýáde beredi. Sóıtip, araǵa shırek ǵasyr salyp, 2019 jyly Frederık Starr sózinde turyp, mýzykalyq aspapty Qazaqstannyń AQSh-taǵy elshiligine tapsyrǵan.