Kásiporynnyń qoǵammen baılanys bólimi málim etkendeı, 1 aqpanda regeneratorlarda temperatýra kóterilip ketken. Sonyń saldarynan katalıtıkalyq krekıng qondyrǵynyń jumysy toqtatylǵan.
«Mamandar aqaýlardy anyqtaǵan soń, «QazMunaıGaz» AQ» UK» basqarma tóraǵasy Maǵzum Myrzaǵalıevtiń tapsyrmasymen qondyrǵynyń jumysyn qalpyna keltirý úshin jedel shtab quryldy. Basqarma tóraǵasynyń munaı óńdeý jáne munaı hımııasy jónindegi orynbasary Arman Qaırdenov jetekshilik etetin jedel shtab katalıtıkalyq krekıng qondyrǵysyn jóndeý-qalpyna keltirý jumystaryn qadaǵalaýǵa aldy», dep habarlady zaýyttyń qoǵammen baılanys bólimi.
Qondyrǵydaǵy aqaýdy joıyp, qalpyna keltirý jospary ázirlengen. Aldymen reaktorly-regeneratorlyq qondyrǵy tolyq tekseriledi. Sóıtip, munaı ónimderin shyǵarý úderisine áserin baǵalaý júrgiziledi. Sol sebepten, jóndeý-qalpyna keltirý jumystaryna katalıtıkalyq krekıng úderisiniń lısenzıary – Axens kompanııasynyń mamandary da tartylǵan. Lısenzıar júrgizgen tekserýdiń nátıjesine sáıkes jóndeý-qalpyna keltirý jumystary 18 aqpanda aıaqtalmaq. Al qondyrǵyny iske qosý jumystary 18-22 aqpan aralyǵynda júrgiziledi. Katalıtıkalyq krekıng qondyrǵysy tolyq jumys rejimine 23 aqpanda qosylatyny josparlanyp otyr.
Osyǵan baılanysty «QazMunaıGaz» AQ» UK» basqarma tóraǵasy Maǵzum Myrzaǵalıev zaýyt basshylyǵymen keńes ótkizdi. Keńes kezinde kásiporyn bas dırektorynyń birinshi orynbasary Rahymjan Janǵabylov qyzmetinen bosatyldy. Keıin ol kásiporynnyń departament basshylyǵyna oraldy. Al zaýyttyń bas dırektory Murat Dosmuratovqa qatań sógis berildi.
Atyraý oblysy
