Bılet satylymynan túsken jáne konsert ýaqytynda jınalǵan barlyq qarjy AFAD (Apattar men tótenshe jaǵdaılardy joıý basqarmasy) esepshotyna aýdarylady. Sharany 2010 jyly halyqaralyq TÚRKSOI uıymy aıasynda qurylǵan halyqaralyq jastar kameralyq orkestri uıymdastyrady. Aksııaǵa Túrkııanyń Almaty qalasynda bas konsýldyǵy qoldaý kórsetti.
«Búgin bizdiń jaqyn baýyrlarymyz, týystas Túrik eli tabıǵı apattan zardap shegip, aýyr kúnderdi bastan ótkerýde. Muny barlyq aqparat quraldarynan kórip otyrsyzdar. Túrik álemine árdaıym qol ushyn sozýǵa daıyn turatyn Túrkııa eli búginde bizdiń kómekke muqtaj bolyp otyr. Baýyrlarymyzǵa tek qarjylaı kómekke ǵana emes, moraldyq qoldaý asa qajet. Olar bizdiń júrekten shyqqan jyly sózderimiz ben týystyq qoldaýymyzdy sezinýleri kerek. Bul qadamymyz olarǵa úmit syılap, jigerlendiredi. Biz, halyqaralyq TÚRKSOI uıymy túbi bir túrki elderiniń ónerpazdaryna «Biz birgemiz» degen uranmen kómek kórsetýge shaqyrdyq. Allaǵa shúkir, bizge qulaq asqandar kóp boldy. Túrkııanyń qıyn kúnderinde, jandarynda bolaıyq!», dedi TÚRKSOI uıymynyń Bas hatshysy Sultan Raev.
«TÚRKSOI uıymynyń arqasynda Túrkııa TÚRKSOI halyqaralyq jastar kameralyq orkestri úshin ekinshi úıi bolyp qaldy. 2010 jyldan beri biz ujymmen birge Anadoly elinde birneshe ret jáne álemniń ár túkpirinde óner kórsettik. Bizdiń baýyrlar kórgen qaıǵy-qasiret barlyǵymyzdyń júregimizdi ezdi, qara jamylǵan árbir otbasyǵa qaıǵyryp kóńil aıtamyz. Bul qaıyrylymdylyq kesh arqyly biz - Almaty qalasynyń mýzykanttary týystas elge qoldaý kórsetkimiz keledi», dedi «GATOB_QUARTET»tobynyń birinshi skrıpkashysy, uıymdastyrýshy Ásem Qalman.
Qaıyrymdylyq keshte «GATOB_QUARTET»jáne «4RIVERS QUARTET» ishekti kvartetteriniń klasıkalyq shyǵarmalary oryndalady. Opera trýppalarynyń solısteri Oleg Tatamırov pen Erjan Tájimbetov kesh qonaqtary úshin arnaıy baǵdarlama daıyndady. EverJazz djaz-klýbynyń rezıdentteri tanymal juldyz Dıana Makına, Take off Trio, Ekaterına Homenkova jáne Aleksandr Rýdovskııde sahnada óner kórsetedi.
«Qazaqstannyń mýzykanttary men EverJazzklýbynyń músheleri aýyr kezeńderdi bastan ótkerip jatqan Túrkııa halqyna beı-jaı qaraı almaıdy. Barynsha qoldaý kórsetýge daıynbyz», dedi EverJazz djaz-klýbynyń dırektory Alekseı Glazyrın.
