ASTANA. 20 maýsym. Búgin tań aldynda Nataldyń «Arena das Dýnas» stadıonynda aıaqtalǵan Japonııa men Grekııa quramalarynyń kezdesýinde álem chempıonatyndaǵy tórtinshi teń oıyn jáne ekinshi 0:0 degen esep tirkeldi. Bul týraly egemen.kz habarlady.
Japonııa – Grekııa 0:0.
20 maýsym. Natal. «Arena das Dýnas» stadıony. 39 485 kórermen. Tóreshi – Hoel Agılar (Salvador).
Japonııa: Eıdzı Kavasıma, Asýto Ýtıda, Maıa Iosıda, Iаsýıýkı Konno, Iýto Nagatomo, Hotarý Iаmagýtı, Makoto Hasebe (Iаsıhıto Endo, 46), Sındzı Okadzakı, Keısýke Honda, Esıto Okýbo, Iýıa Osako (Sındzı Kagava, 57).
Grekııa: Orestıs Karnezıs, Vasılıs Torosıdıs, Kostas Manolas, Sokratıs Papastatopýlos, Hose Olebas, Iаnnıs Fetfasıdıs (Georgıos Kragýnıs, 41), Iаnnıs Manıatıs, Kostas Kasýranıs, Panaıotıs Kone (Dımıtrıos Salpıngıdıs, 81), Georgıos Samaras, Kostas Mıtroglý (Teofanıs Gekas, 35).
Eskertýler: Makoto Hasebe (12) – Kostas Kasýranıs (27), Georgıos Samaras (55), Vasılıs Torosıdıs (89).
Qýylý: Kostas Kasýranıs (38).
Birinshi týrda utylysta ushyraǵan eki komandanyń bul kúngi jekpe-jegi onshalyqty tartymty bola qoıǵan joq. Mundaǵy másele tipti qaqpalarǵa dop túspegeninde ǵana emes. Degenmen, japondardy da, grekterdi de tartynyp oınady dep kesip aıta almasaq kerek. Bizdińshe, eki jaq ta qoldarynan kelgenderin istep baqqan sııaqty. Biraq sonda da oıyn súreńsizdeý bolyp órnek túzdi. Áıtpese osy kezdesýdegi jeńis samýraılarǵa da, elladalyqtarǵa da aýadaı kerek edi.
Komandalar ózderiniń oıyn sóreden shyqqan kezeńin barynsha muqııat ótkizdi. Qarsylastar sol abaılap basqan qımyl-árekettiń barysynda bir-birleriniń aıyp alańdaryna birneshe ret basa-kóktep kirip te jatty. Alaıda, ujymdarǵa budan tıimdi qorytyndy shyǵarýdyń reti kele qoımady. Sondaı joryqtardyń birinde grekterge buryshtama berýdiń sáti tústi. Áıtkenmen, dopqa jalpy japondar kóbirek egelik etti. Alberto Dzakkeronıdiń shákirtteri oıyn tizginin óz qoldaryna alyp alǵandarymen, olarǵa qarsy jaqtyń tyǵyz turǵyzylǵan qorǵanys dýaldarynan ary qaraı attap ótý ońaıǵa soqpady. Al grekter «sáttilik kiltin» kóbine qarsy shabýyldardan izdep turdy. Solardyń birinde ejelgi elladalyqtardyń urpaqtary esep ashyp ta kete jazdady. Ol Panaıotıs Koneniń joldan ilip áketken dobymen alań ortasynan aǵyp ótip kelip, shamamen 25 metr jerden darbazaǵa dyqattap soqqy jasaýymen kórinis berdi. Biraq qaqpashy Eıdzı Kavasıma mundaı soqqyny qabyldaýǵa ázir bolyp shyqty. Kóp uzamaı grekter qaýipti tustan qaqpaǵa qaraı aıyp dobyn urý múmkindigine de qol jetkizdi.
Taımnyń ekvatoryna taıanǵan tusta japondar tizgindi qaıtadan ózderine qaraı tartyp áketti. Olardyń bul áreketterine osydan keıin grekterdiń komanda kapıtany Kostas Kasýranıstiń ekinshi márte «sary qaǵaz» alý arqyly alańnan qýylyp ketýi otqa maı quıǵandaı áser etti. Osydan keıin Kúnshyǵys eliniń ulandary ózderine asa kerekti jeńisti julyp áketý úshin aıanyp qalǵan joq. Buǵan Grekııa fýtbolshylary saýatty qorǵana otyryp, udaıy qaýiptiń bultyn óz aıyp alańdary mańynan qashyqtatyp turýǵa barynsha kúsh salýmen jaýap qaıtardy.
Kezdesýdiń ekinshi bóliginde de osy oıyn óziniń jalǵasyn tapty. Onyń alǵashqy mınýttarynan oıynshylarynyń sany artyq japondardyń kóp kúshpen shabýylǵa shyǵyp turatyny, al grekterdiń tasqamal qorǵanysqa tirek arta otyryp, sırek burq ete qalatyn qarsy shabýyldarǵa súıenetini belgili bolyp qaldy. Sonyń pátinde samýraılar jappaı joryqqa bas qoıdy. Alaıda, olardyń shabýyldarynda ótkirlik pen tapqyrlyq jetispeı jatty. Kil biróńkeı júıemen urǵan tasqynnyń betin qaıtarý sondyqtan elladalyqtarǵa tym qıynǵa soqqan joq. Muny az deseńiz, grekter qarsy shabýyldardy da jıi qoldanyp turdy. Sondaı sátterdiń birinde olar qatarynan úsh ret buryshtama dobyn berdi. Fernandý Santýshtyń shákirtteri sol yrǵynda Kavasıma qorǵaǵan qaqpany qaqyratyp ótýge de sál qaldy.
Japondar taımnyń ortasynda ǵana oıyndy teńestirip, qysym jasaýyn qaıta jalǵastyra bastady. Biraq qarsy jaqtyń óte úılesimdi turǵyzylǵan qorǵanys shebin setinetip ótýge aqyry shamalary kelmedi.
Damır Qojamqul.
Derekkóz: Chempıonat.Rý.
Foto:Sportbox.ru.
