Konferensııaǵa qatysýshylar qazirgi zamanǵa fılosofııalyq taldaý júrgizip, etıka men moraldyq jaýapkershilik máselelerin, qazirgi zaman konteksindegi qazaq fılosofııasynyń damý perspektıvalaryn talqylady.
Jıynda EUÝ rektory Erlan Sydyqov Jabaıhan Ábdildınniń otandyq parlamentarızmdi damytýǵa jáne Qazaqstandaǵy adam quqyqtaryn qorǵaýǵa qosqan zor úlesin atap ótti.
– Ulttyq zamanaýı kásibı fılosofııa ǵylymynyń qalyptasýy Jabaıhan Múbárakulynyń esimimen tikeleı baılanysty. Qazaqstandaǵy alǵashqy dıalektıkalyq logıka mektebiniń negizin qalaǵan jáne otandyq fılosofııanyń damýyna baǵa jetpes úles qosqan ǵylymı-zertteý eńbekteri, kópjyldyq aǵartýshylyq qyzmeti bizdiń rýhanı muramyzdyń altyn qazynasyna aınaldy, – dedi ol.
Akademıktiń konferensııa aıasynda tanystyrylǵan 25 tomnan turatyn jınaǵynda keıingi 5-7 jylda jazǵan eńbekteri qamtylǵan. Oǵan Kant pen Gegel fılosofııasy, Abaı, Á.Bókeıhan, M.Áýezov, Shekspır, M.Gorkıı, taǵy da basqalar týraly shyǵarmalary engen. Sonymen qatar jańadan jaryq kórgen jınaqta qoǵamnyń damý úderisindegi din formalarynyń evolıýsııasy, ómir týraly fılosofııalyq oılar berilgen.
Akademıktiń eńbekteri stýdentterge, magıstranttarǵa, doktoranttarǵa, sonymen qatar fılosofııa men rýhanı mádenıetke qyzyǵýshylyq tanytatyn qalyń oqyrman qaýymǵa arnalǵan.
– Men qazir ǵylymı turǵyda eńbek etip jatyrmyn. Bári oıdaǵydaı bolyp, 30 tomdyq kitap jaryqqa shyǵyp jatsa, muny Qazaqstannyń táýelsizdigine qosqan úlesim dep esepteımin. Kóp nárse jasaý úshin kóp eńbek etý kerek. Erinbeı eńbek etken adam sharshamaıdy. Eger adamnyń mıy qartaıa bastasa, onda adamnyń ózi de qartaıady, – deıdi fılosof.
