Jaqynda onyń sondaı úlgide salynǵan «Munar kún» kartınasy London qalasynda ótken «Altyn talanttar ýaqyty» halyqaralyq baıqaýynyń birinshi júldesin ıelendi. Onlaın formatta ótken baıqaýǵa álemniń 39 elinen 200-ge jýyq úmitker qatysqan.
– Halyqaralyq baıqaýdyń jarnamasyn áleýmettik jeliden kórgen edim. Byltyrǵy qarashada birneshe kartınanyń arasynan bireýin tańdap, baǵymdy synap kórý úshin jiberdim. Bul baıqaý 2007 jyldan beri turaqty ótip keledi, – deıdi Nazerke Ishanova.
Ol 1836-1838 jyldardaǵy halyq-azattyq kóterilisiniń kósemi Isataı Taımanulynyń týǵanyna 230 jyl tolýyna oraı daıyndalǵan «Asqaq rýh» kitabynyń betteýshi-dızaıneri bolǵan. Sol kezde tarıhshy ǵalymdar men ólketanýshylardyń zertteý eńbekterimen jete tanysqan. Keıin batyr Mahambet О́temisuly men aqyn Yǵylman Shórekulynyń Isataı týraly jyrlaryn qyzyǵa oqypty. Sol kezde qııalynda batyrdyń kesek tulǵasy qalyptasa bastaǵan.
– Qazaq degen uly halyqtyń shynaıy ǵumyrdastany áli jazylyp bitken joq. Talaı jyl, talaı ǵasyr boıy ultymyzdyń ǵumyrdastany jazyla beredi. Sondyqtan bul kartınamdy azattyqtyń aq tańyn ańsap kútken, ólsheýli ómiri at ústinde joryqpen ótken Uly dala batyry Isataı Taımanulynyń asqaq rýhyna arnaǵan edim, – deıdi dızaıner N.Ishanova.
Qazir dızaıner «Qyr balasy» qoǵamdyq qorynyń múshelerimen birge el táýelsizdigi úshin qanyn tógip, janyn bergen ult batyrlary men qýǵyn-súrginge ushyraǵan Alash arystarynyń ómirin, eńbegin zerttep júr. Onyń jeke qorynda ult zııalylary, batyrlar men arystary beınelengen 50-den astam kartına bar. Kartınanyń bári Digital Art stılinde salynǵan.
Atyraý oblysy
