Mınıstr Aıdarly aýyldyq okrýgine qarasty «Sky Agro» JShS-nyń qyzanaq ósiretin jylyjaıyna bardy. Mundaǵy jumys barysymen seriktestik dırektory Ilmaz Kemal tanystyrdy. Jylyjaı 2016 jyldan beri halyqqa qyzmet kórsetip keledi. Onyń jalpy jobalyq quny 7,2 mıllıard teńgeni quraıdy. Negizinen tomat ónimin shyǵaratyn kásiporyn jylyna 750 tonna qyzanaq óndirip satady. Seriktestik Almaty qalasynyń Almaty, Jetisý oblystarynyń turǵyndaryn jyl boıy qyzanaqpen qamtamasyz etedi.
Odan keıin mınıstr «Kóktal Agro» JShS taýarly-sút fermasynyń jumysymen tanysty. Myń gektardan astam jerge júgeri, kópjyldyq shóp ósiretin sharýashylyqtyń jemshóp bazasy myǵym. Sondyqtan seriktestik 2,5 mlrd teńgege myń bastan astam saýyn sıyr ustaı alatyn keshendi qora salyp, 2019 jyly taýarly-sút fermasyn iske qosty. Seriktestik malyn jyl boıǵy jemshóppen ózderi qamtamasyz etip otyr. Mınıstrge fermadaǵy ilkimdi isterdi JShS jetekshisi Jánibek Oqanov kórsetip, seriktestik jumysynyń mán-jaıyn aıtyp berdi.
Jarkent qalasynda polıpropılennen jylyna 48 mıllıon qap shyǵaratyn zaýyt qurylysy 2012 jyly paıdalanýǵa berilgen. Zaýyttyń jumys isteý júıesi birneshe sehtan turady. Munda bastapqyda munaı qaldyǵynan alynatyn 21030-16 markaly polıpropılennen qyzdyryp eritý arqyly jip ıiriledi. Kelesi kezekte ol jip toqylyp, jalpaq materıalǵa aınalyp, odan suranysqa qaraı syıymdylyǵy 25-ten bastap, 150 kılolyq qaptar tigiledi. Qazir zaýytta 552 adam aýysymdyq júıemen jumys istep keledi.
«Zaýyt ónimderine suranys joǵary. Sapaly tigilgen qaptarǵa otandyq taýar óndirýshilermen qatar Reseı, Ýkraına, Baltyq jaǵalaýy elderi tapsyrys beredi», deıdi mınıstrge zaýyt tirshiligin tanystyrǵan JShS dırektory Zakır Kýzıev.
Shahardaǵy 2013 jyldan beri júgeri dánin óńdeıtin «Jarkent krahmal-sirne» zaýyty – búgingi tańda qanatyn keńge jaıǵan iri ónerkásip oryndarynyń biri. Munda 292 adam turaqty eńbek ornyn tapqan. Zaýyt ónimniń sapasyn baqylaıtyn óz zerthanasy bar.
Bıyl Panfılov aýdanynyń júgerishileri jalpy 26 myń gektardan astam jerge júgeri egip, 160 myń tonnadan joǵary ónim alǵan. О́tken jylmen salystyrǵanda bıyl ónim 20 myń tonnaǵa artyq. Sonyń 100 myń tonnadan astamyn «Jarkent krahmal-sirne» zaýyty satyp alyp, uqsatýda. «Jarkent krahmal-sirne» zaýytynyń júgeri dáninen óńdegen ónimderin elimizdegi «Rahat», «Treıdıng qaǵazy», «Hamle», «Ile karton-qaǵaz kombınaty», «Jambyl gıps», «Rýdstroıservıs», «Qazýpak», AHBK kompanııalary satyp alady. Zaýyt ónimine shetelderden de tapsyrystar bar.
Aýyl sharýashylyǵy mınıstri óńirdegi óndiris oryndaryn aralaýmen qatar sapar barysynda «Ýnıversal» JShS jıynjaıynda aýylsharýashylyq eńbekkerlerimen kezdesip, aktıv jıynyn ótkizdi. Basqosýda mınıstr elimizdegi agroónerkásip óndirisiniń jańalyqtaryn jetkizdi. Sonymen qatar Jetisý oblysy eńbekkerleriniń ótken jylǵy óndiristegi jetistikteri saralandy. Bıyl atqarylatyn jumys josparlary talqylandy.
Kezdesýden keıin jeke máseleleri boıynsha aýdan turǵyndaryn qabyldaǵan mınıstr usynys-ótinishterdi Úkimet otyrysynda taldap, sheshim qabyldaıtynyn málimdedi.
Jetisý oblysy
