Biz esebin bergeli otyrǵan maýsymnyń 19-ynan 20-syna qaraǵan túni álem chempıonatynda úsh oıyn oınaldy. Olardyń ekeýinde 2:1 degen esep tirkelip, birinshiliktegi eń jıi qaıtalanyp turǵan bul kórsetkishtiń jalpy sanyn 8-ge jetkizdi. Osylardyń biriniń nátıjesi fýtbol otany sanalyp júrgen Anglııa eliniń quramasyn jarys jolynan kúni buryn shyǵaryp tastady. Taǵy bir oıyn 0:0 degen kórsetkishtiń kólemin ekige eseledi.
Endi osylardyń bárin óz ret-retimen baıandaıyq. Bul kúni qarsylastar arasynda alańǵa Kolýmbııa jáne Kot-d`Ivýar komandalary birinshi bolyp shyqty. Match 2:1 esebimen amerıkalyqtardyń paıdasyna sheshildi. Ár taımnyń ártúrli kórinis bergenine qaramastan, oıyn jurttyń kútken deńgeıinen tabyldy. Úziliske deıin shyn máninde eki komandada da gol soǵatyndaı múmkindikter bolǵan joq. Eń bir qolaıly sátti Hames Rodrıges jetkizgen dopty qaqpaǵa týra baǵyttaı almaǵan Teofılo Gýterres jiberip aldy.
Ekinshi taımnyń basy týra birinshi bóliktegideı joǵary qarqynmen órbidi. Muny, ásirese, Kolýmbııa quramasy kóbirek ustandy. 58-mınýtta Hýan Kýadrado dopty qıys buryshtan uryp, qaqpa baǵanyna tıgizdi. Kóp uzamaı «kofeshiler» bul basymdylyqtaryn golǵa aınaldyra bildi. Buryshtamadan aıyp alańyna tastalǵan dopqa talasta Rodrıges janyndaǵy Dıde Drogbadan buryn qımyldap, ony basymen qaqpaǵa baǵyttap úlgerdi. Arada 6 mınýt ýaqyt ótkende, álgindegi Rodrıges qarsy bette dopqa qol jetkizip, kezekti keń qanatty shabýyldy bastap berdi. Onyń aıaǵynan jetken dopty oıynǵa endi qosylǵan Hýan Kıntero qaqpaǵa dál uryp túsirdi. Esep osylaısha demde 2:0-ge jetti.
Biraq bul ıvýarlyqtardyń eńsesin qatty túsire qoımaǵan sııaqty. Muny osydan keıin olardyń birneshe ret tegeýrindi shabýyl uıymdastyrýlary baıqatty. Sondaı jigerli joryqtardyń birin ózi bastaǵan Jervıne sol qaptalmen atylyp shyǵyp, jolaı birneshe básekelesin oraǵytyp ótti. Sosyn aıyp alańynyń ishine kirdi de, birden qaqpashynyń oń jaǵyn ala urdy. Gol! Osy doptan keıin «pilder» oıynnyń qalǵan ýaqytynda qarsy qaqpa jaqtan shyqpaı qoıdy. Alaıda, sol tolassyz shabýyldardan tıisti nátıje shyǵara almady.
Budan keıin alań tórine Ýrýgvaı jáne Anglııa fýtbolshylary kóterildi.
Anglııa quramasy jahandyq jarystaǵy osy kezge deıingi eki oıynyn da 1:2 degen eseppen aıaqtady. Albıon jerinen kelgen jigitterdiń alǵy kúnge asyqqan armandarynyń alaýyn ózderine tanys Lýıs Sýares esimdi jalǵyz shabýylshy bir demmen óshirip tastady. Kezdesýdiń birinshi taımynda oıynnyń baıaý qarqynmen órbigenine qaramastan, komandalar óz jankúıerlerin birqatar tartysty oqıǵalarymen eliktirip turdy. Osy tustarda qaqpa qulpyn ashýdyń tamasha múmkindikterin Krıstıan Rodrıges, Edınson Kavanı jáne Ýeın Rýnı syndy oıynshylar jiberip aldy. Alaıda, gol bir-aq ret soǵyldy. Ony Lýıs Sýares aǵylshyndar qaqpasyna týra baǵyttady. Ýrýgvaı jankúıerleri osynyń aldynda Kosta-Rıkamen ótken oıynda alańǵa shyqpaǵan tap osy forvardtan úmit kútip otyr edi. Ras, Lýıs oıynnyń basynda óziniń áreketimen erekshelene qoımady, oıyn tizginin de qolǵa sırek aldy. Degenmen, ózine tap kelgen birinshi múmkindikti keremet paıdalanyp, Djo Harrıdi qapyda qaldyrdy.
Ekinshi taım Oskar Tabares shákirtteriniń shabýylymen bastaldy. Biraq aǵylshyndar ýaqyt ozǵan saıyn basymdylyqtaryn arttyra berdi. Nátıjesinde ekinshi taımnyń ortasynan bastap ýrýgvaılyqtar óz alańy mańyna tyqsyrylyp tastaldy. Sonyń pátinde aǵylshyndar esepti de teńestire aldy. Qaptaldan Glen Djonson jetkizgen dopqa Ýeın Rýnı egelik etti. Ol qaqpa aldyndaǵy qarbalas shaqta Fernando Mýslerany qapyda qaldyrdy. Osydan jigerlengen brıtanııalyqtar budan da ári ketti. Qaýyrt shabýyldar ıiriminde Danıel Starrıdj aıyp alańy syzyǵynan óte qatty urdy. Ýrýgvaı qaqpashysy bul dopty áýpirimmen syrtqa jóneltti. Biraq amerıkalyqtarda osyndaı qysyltaıań kezderi tuıyqtan sańylaý taýyp, shyǵyp ketetin bir adam bar eken. Ol – Lýıs Sýares oıyn bitýge 5 mınýt qalǵanda kezekti qaýiptiń bultyn ózimen birge ilgeri áketip, alǵa tura umtyldy. Bir kezde ol Djo Hartpen birge-bir shyqty da, qaqpashy janynan dopty zý etkizdi. Gol! Sonymen, esep 2:1-ge jetti.
Al keshe tań aldynda Nataldyń «Arena das Dýnas» stadıonynda aıaqtalǵan Japonııa men Grekııa quramalarynyń kezdesýinde esep ashylǵan joq. Komandalar oıynnyń basyn barynsha muqııat ótkizdi. Olar abaılap basqan qımyl-árekettiń barysynda bir-birleriniń aıyp alańdaryna birneshe ret basa-kóktep kirip te jatty. Alaıda, ujymdarǵa budan tıimdi qorytyndy shyǵarýdyń reti kele qoımady. Sondaı joryqtardyń birinde grekterge buryshtama berýdiń sáti tústi. Áıtkenmen, dopqa jalpy japondar kóbirek ıelik etti. Alberto Dzakkeronıdiń shákirtteri oıyn tizginin óz qoldaryna alyp alǵandarymen, olarǵa qarsy jaqtyń tyǵyz turǵyzylǵan qorǵanys dýaldarynan ary qaraı attap ótý ońaıǵa soqpady. Al grekter «sáttilik kiltin» kóbine qarsy shabýyldardan izdep turdy. Solardyń birinde ejelgi elladalyqtardyń urpaqtary esep ashyp ta kete jazdady. Ol Panaıotıs Koneniń joldan ilip áketken dobymen alań ortasynan aǵyp ótip kelip, shamamen 25 metr jerden darbazaǵa soqqy jasaýymen kórinis berdi. Biraq qaqpashy Eıdzı Kavasıma mundaı soqqyny qabyldaýǵa ázir bolyp shyqty. Kóp uzamaı grekter qaýipti tustan qaqpaǵa qaraı aıyp dobyn urý múmkindigine de qol jetkizdi.
Taımnyń ekvatoryna taıanǵan tusta japondar tizgindi qaıtadan ózderine qaraı tartyp áketti. Olardyń bul áreketterine osydan keıin grekterdiń komanda kapıtany Kostas Kasýranıstiń ekinshi márte «sary qaǵaz» alý arqyly alańnan qýylyp ketýi otqa maı quıǵandaı áser etti. Osydan keıin Kúnshyǵys eliniń ulandary ózderine asa kerekti jeńisti julyp áketý úshin aıanyp qalǵan joq. Buǵan Grekııa fýtbolshylary saýatty qorǵana otyryp, udaıy qaýiptiń bultyn óz aıyp alańdary mańynan qashyqtatyp turýǵa barynsha kúsh salýmen jaýap qaıtardy.
Kezdesýdiń ekinshi bóliginde de osy oıyn óziniń jalǵasyn tapty. Onyń alǵashqy mınýttarynan oıynshylarynyń sany artyq japondardyń kóp kúshpen shabýylǵa shyǵyp turatyny, al grekterdiń tasqamal qorǵanysqa tirek arta otyryp, sırek burq ete qalatyn qarsy shabýyldarǵa súıenetini belgili bolyp qaldy. Sonyń pátinde samýraılar jappaı joryqqa bas qoıdy. Alaıda, olardyń shabýyldarynda ótkirlik pen tapqyrlyq jetispeı jatty. Kil biróńkeı júıemen urǵan tasqynnyń betin qaıtarý sondyqtan elladalyqtarǵa tym qıynǵa soqqan joq. Muny az deseńiz, grekter qarsy shabýyldardy da jıi qoldanyp turdy. Sondaı sátterdiń birinde olar qatarynan úsh ret buryshtama dobyn berdi. Fernandý Santýshtyń shákirtteri sol yrǵynda Kavasıma qorǵaǵan qaqpany qaqyratyp ótýge de sál qaldy.
Japondar taımnyń ortasynda ǵana oıyndy teńestirip, qysym jasaýyn qaıta jalǵastyra bastady. Biraq qarsy jaqtyń óte úılesimdi turǵyzylǵan qorǵanys shebin setinetip ótýge aqyry shamalary kelmedi.
Serik PIRNAZAR,
«Egemen Qazaqstan».
