Elbasymen birge túsken sýretim úıimizdiń tórinde tur

Men budan tórt jyl buryn Aqjaıyq óńirine kelgen saparynda Elbasyna qazaq halqynyń kelini retinde izetpen ıilip, sálem bergen kúnimdi ómirimniń baqytty sátteriniń biri dep sanaımyn. Sol kúni maǵan kópbalaly ana retinde Memleket basshysynyń atynan syńǵyrlaǵan sý jańa úıdiń kilti de tapsyrylyp edi. Muny qalaısha umytarmyn. Qýanyshtan júzimiz bal-bul janǵan osyndaı sátterdiń birinde maǵan Nursultan Ábishuly: «Aınalaıyn, Natalıa, halqymyz qashanda qyzyn da, kelinin de qurmettep, syılaı bilgen. Qazaq halqyna bes birdeı perzent syılaǵan orys qyzy, qazaqtyń kelini retinde sen de mundaı qurmetke ábden laıyqtysyń. Bastaryńnan baq taımasyn. Baqytty bolyńdar. Ul-qyzdaryń oılaǵan maqsattaryna jetsin», – dep ákelik qamqorlyqqa toly tereń sezimmen til qatyp edi. Sodan soń Nur-aǵań maǵan: «Bizge aıtatyn oı-pikiriń bolsa uıalmaı aıt, tyńdaýǵa ázirmiz», – dep taǵy da úlken yqylas-peıil tanytty. Sol sátte úlken kisiniń aldynda ıba saqtap, qysylyp turǵanym ras edi. Degenmen, álde bir sezim men bula kúsh meni oıymdy ashyq aıtýǵa ıtermelegendeı boldy da, Elbasymen kezdesýge jınalǵan jurtshylyqtyń aldynda taza qazaq tilinde bylaı dedim: – Márııam Jagorqyzy apamyz sonaý HIH ǵasyrda qazaqtyń Dýman degen jigitine ǵashyq bolsa, arada bir ǵasyr ótken soń men, ıaǵnı ol kisiniń sińlisi qazaqtyń Esáli degen jigitine ǵashyq boldym. Ekeýmiz eki ul, úsh qyz dúnıege ákelip, tárbıelep ósirip kelemiz. Uldarymyzdyń attaryn Qazı jáne Qarasaı dep atasaq, qyzdarymyzdyń esimderin Mahabbat, Móldir, Sezim dep qoıdyq. Olardyń aty-jónderin nege bulaı dep qoıdyńdar dep áýestikpen suraq qoıatyndar da bar. Men olarǵa bylaısha jaýap qaıtaramyn. Perzentterimizdiń esimderin qoıýǵa negizinen ózim bastamashy boldym. Bul oıymdy otbasy ıesi, súıip qosylǵan azamatym, balalarymnyń ákesi de qoldady. Naqty aıtqanda, qyzdarymyzdyń esimderi Esálige degen mahabbatym men móldir sezimimniń belgisi bolsyn dep túıdim. Mine, Elbasyna aıtqan sózimdi osylaı aıaqtap edim. Ári bul meniń ımandaı shynym da, aq adal syrym da edi. Sodan soń Nur-aǵań maǵan jyly júzben: «Rahmet saǵan, Natalıa, kel sýretke túseıik», – dep usynys jasady. Qazir osy sýret úıimizdiń tórinde tur. Búgin men ony Esáli ekeýmiz jyl saıyn jazdyrtyp alyp oqıtyn «Egemen Qazaqstan» gazeti oqyrmandarynyń nazaryna usynyp otyrmyn. Natalıa TÁTTIǴULOVA, kópbalaly ana. Batys Qazaqstan oblysy.