Polısııa basqarmasy – oblystaǵy eń iri ishki ister bólinisi. Sol sebepti quqyq buzýshylyq, qylmys boıynsha da kóp oqıǵa osy aýmaqta tirkeledi. Oblys ortalyǵynda jol apaty jáne qoǵamdyq quqyq buzýshylyqtyń sany da joǵary. Reseımen eki ortadaǵy shekarada ornalasýy da qaladaǵy qylmys sanynyń ósýine ózindik yqpal etedi. О́ıtkeni kórshi elde qylmys jasap, Petropavlda boı tasalaıtyndar nemese kerisinshe qalada zańsyzdyqqa baryp, shekara asyp ketetinder kóp. О́tken jyly ashylmaı qalǵan 60 qylmystyń aq-qarasy anyqtalyp, 41 qylmysker ustalypty. Habar-osharsyz ketken 16 azamattyń júrgen jeri anyqtalǵan. Jyl boıy 199 jol-kólik oqıǵasy tirkelip, sonyń saldarynan 5 adam qaza taýyp, 244 jolaýshy túrli dárejedegi jaraqat alǵan.
Petropavlda elimizdiń basqa qalalarymen salystyrǵanda alkogoldik ishimdik iship, qoǵamdyq oryndarda mas kúıinde júretinder sany kóp kezdesedi. Tek byltyr ǵana sondaı 5200-den astam adam quqyq buzýshy retinde jaýapkershilikke tartylǵan. Sondaı-aq quramynda spırti bar 17 myń lıtrden astam alkogol zańsyz aınalymnan alyndy.
Álibek Ǵabdýllın jeke quram qylmys pen quqyq buzýshylyqtardyń aldyn alý boıynsha da barlyq qajetti sharalardy qabyldap jatqanyn atap ótti. «Biraq elektrondyq tólemder jáne onlaın-dúkender arqyly, jalpy aqparattyq tehnologııalardy paıdalana otyryp jasalatyn alaıaqtyq túrlerin tolyq áshkereleýge shamamyz kelmeı otyr. Bir jyl ishinde 818 alaıaqtyq deregi tirkeldi. Onyń ishinde 657 fakti ınternet arqyly jasalǵan», dedi ol.
Al profılaktıkalyq jumystar kún saıyn barlyq jeke quramnyń qatysýymen júrgiziledi. Osyndaı jumystyń nátıjesinde ótken jyly 600-den astam azamat ınternet alaıaqtarmen sóılesýden bas tartyp, qylmystyń aldyn alǵan. Kezdesýge kelgender otbasylyq janjalqoılarǵa qatysty qabyldanatyn sharalar, jolaýshylar tasymalyn uıymdastyrý, ishki ister organdaryna jumysqa ornalasýǵa qatysty máselelerdi ortaǵa saldy. Solardyń ishinde polısııanyń quzyretine kiretin barlyq suraqqa jaýap berildi.
PETROPAVL
