Qaıyrym jasaýdan Qaraǵandyda qalys qalǵandar kemde-kem. Kásipkerler qarjylaı jáne qajetti taýar túrinde qol ushyn sozsa, kópbalaly analar men stýdentter qaýymy aksııaǵa muryndyq boldy.
«Kásipkerler aqsha jáne qajetti taýarlar túrinde gýmanıtarlyq kómek kórsetti. Bul – iri kompanııalar, orta jáne shaǵyn bıznes ókilderi. Olardyń arasynda Túrkııamen bıznes-seriktestik ornatqan kásipkerler de bar», deıdi Qaraǵandy oblysynyń kásipkerlik palatasynyń baspasóz qyzmeti.
«Shańyraq» kópbalaly otbasylar ortalyǵy qaıyrymdylyq aıasynda jınalǵan qarjyǵa Osakarov aýdanyndaǵy tigin sehynan júzden asa kórpe satyp aldy. Al Aqtoǵaı aýdanyndaǵy kópbalaly ana Dámet Dýanbekova zardap shekken baýyrlarǵa arnap, kórpesheler tigipti. Qaıyrymdylyq aıasynda kóptegen kórpe-jastyq, balalarǵa arnalǵan zattar, jórgek jáne ózge de qajettilikter jınaqtalǵan eken.
Qaıyrym jasaýdan joǵary oqý orny stýdentteri de tysqary qalǵan joq. E.Bóketov atyndaǵy Qaraǵandy ýnıversıteti stýdentteri osy maqsatta jármeńke uıymdastyrǵanyn atap ótken jón. Olardyń arasynda mehendı sheberleri de, ekojobaǵa qatysýshylardyń ónimderi de bar. Túsken 2 mln teńge kólemindegi qarajat túrik baýyrlarǵa jiberilgen.
Al oblystyń Jastar resýrstyq ortalyǵynyń janynan ashylǵan gýmanıtarlyq kómek jınaý pýnktinde eriktiler kúnde kezekshilik atqarady. Eriktiler qarasha halyq ákelgen zattardy qabyldap, ony suryptap, býyp-túıedi. Halyq kóbine kıim-keshek, tósek-oryn jabdyqtaryn ákep beripti.
«Qarapaıym adamdardyń osynaý ıgi iste belsendilik tanytqany qatty qýantty. Eresektermen birge olardyń balalary da, nemereleri de keldi. Egde jastaǵy erli-zaıypty adamdar birneshe jańa kórpe, balalardyń jańa aıaqkıimderin tapsyrdy. Halyq beıjaı otyra almaımyz dep, shyn júrekten kómek berip jatyr», deıdi front-keńsedegi jastar.
Mundaı jınaqtaý pýnktteri oblystyń barlyq qala-aýdanynda uıymdastyryldy. Halyqtyń shynaıy peıili men ystyq yqylasyn arqalaǵan buıymdar Túrkııa elshiligine jiberildi.
Qaraǵandy
