Máselen, Aqmola oblysy boıynsha Iýjnaıa kóshesi Sábıt Muqanov, Býdennyı kóshesi Baýyrjan Momyshuly, Lenın kóshesi Abylaı han esimderimen qaıta ataldy.
Mádenıet jáne sport mınıstrligine qarasty Mádenıet komıtetiniń aqparaty boıynsha ótken jyly Respýblıkalyq onomastıka komıssııasy 606 usynysty qaraǵan.
«Budan bólek, byltyr Memleket basshysynyń elimizdiń ákimshilik-aýmaqtyq qurylymyn jetildirý boıynsha berilgen tapsyrmasyn oryndaý maqsatynda jańadan qurylǵan úsh oblysqa Abaı, Jetisý, Ulytaý ataýlary berildi. Al Qapshaǵaı qalasy – Qonaev qalasy bolyp qaıta ataldy. Aıta ketý kerek, oblys ataýlary tek memlekettik tilde bekitildi. Sondaı-aq Ahmet Baıtursynulynyń 150 jyldyq mereıtoıyna oraı Qostanaı halyqaralyq áýejaıyna ult ustazynyń esimi berildi», dedi Mádenıet jáne sport mınıstrligine qarasty Onomastıka basqarmasynyń basshysy Elerke Tórehan.
