Parlament Májilisiniń depýtattyǵyna «Aýyl» HDPP atynan túsetin kandıdattar fotokórme aıasynda qala turǵyndaryna partııa saılaýaldy baǵdarlamasynyń negizgi baǵyttaryn túsindirdi. Partııanyń azyq-túlik baǵalaryn turaqtandyrý boıynsha qoldanatyn tásilderi jaıly aıtty. Azyq-túliktiń shyǵý «tórkininen» túsinigi joq, «elimizdiń azyq-túlik qaýipsizdigin dúken qamtamasyz etedi» dep esepteıtin búgingi býynnyń jetesine jeterdeı úgit-nasıhat jumystaryn júrgizdi.
– Azyq-túlik sórelerde óspeıdi, sórelerde baǵa ósedi. Onyń nelikten ósetinin jáne ony qalaı turaqtandyrýǵa bolatynyn «Aýyl» partııasy jaqsy biledi. Salalyq memlekettik organdar men jalpy úkimet úshin negizgi jáne birinshi kezektegi mindet – óndiris kólemin, ásirese ekologııalyq taza ónim kólemin ulǵaıtý, sondaı-aq aýyl sharýashylyǵy óndirýshileri úshin qaıta óńdeý men logıstıkalyq ınfraqurylymdy jolǵa qoıý. О́nimder sórelerge tikeleı túsýi kerek. Biz Májiliske barǵanda azyq-túlik naryǵynan artyq deldaldardy yǵystyrý úshin bar kúshimizdi salamyz. Fermerlerdi iri saýda ortalyqtaryna múmkindiginshe jaqyndatamyz. Partııanyń Parlament Májilisine umtylýyndaǵy basty sebepteriniń biri – osy, – dedi kandıdat Aıbyn Tórehanov.
Metroda ótip jatqan fotokórmege nazar aýdaryp, kandıdattardyń úgit-nasıhatyna qulaq túrgen jolaýshy qalalyqtar kandıdattardyń ustanymyna qyzyǵýshylyq tanytyp, qoldaý bildirdi. Kandıdattar azyq-túlik óndirý isiniń baıybyna barmaıtyn, ony ońaı sharýa dep oılaıtyn qala jastaryna azyq-túlik ónimderiniń dúken sórelerine qandaı eńbekpen keletinin fotokórme arqyly qyzyqty formatta kóz aldaryna keltirip, saýaldaryna jaýap berdi.
«Aýyl» partııasynyń ókilderi bastapqy jáne tereń qaıta óńdeý kásiporyndary úshin salyqtardyń barlyq túrin tolyq joıý mańyzdy ekenin aıtty.
