Tamaqtaný salasyndaǵy iri birlestik bolyp tabylatyn «Evrazııan fýds» óndiristik holdınginde úsh zaýyt pen myńdaǵan qyzmetker jumys isteıdi. Kompanııa bıýdjet salyǵyna tólemderdi árdaıym ulǵaıtyp keledi. Bes jyl buryn 10 mlrd teńge tólese, byltyr salyq tólemi 20 mlrd teńgege ulǵaıǵan.
– Bizdiń maqsatymyz – naryqtyq ustanymdardy, ádil básekelestik pen otandyq óndirýshilerdi qoldaıtyn «Aq jol» partııasynyń parlamenttegi jumysy týraly aıtý. Bir jaǵynan eńbek ujymdarynyń eskertpeleri men ótinishterin tyńdaýdamyz, ekonomıkalyq máselelerden bólek, áleýmettik ádilettilik, jemqorlyqqa qarsy kúres, saıası reformalar jóninde suraqtar túsip jatyr. Bul biz úshin óte mańyzdy, sebebi, «Aq jol» partııasyna senim artatyn jandarmen udaıy baılanysta bolýymyz kerek, – dedi Azat Perýashev.
Partııa lıderi saıası baǵdarlamanyń basym baǵyttaryn atap, jınalǵan qaýymnyń saýaldaryna jaýap berdi. Ásirese, «Aq jol» partııasynyń erkin ekonomıkaǵa kóshý týraly usynystaryna erekshe toqtaldy.
– Elimizde tek 5 banktiń ózi ǵana barlyq bank sektorynyń 65% baqylaýynda ustap otyr. Sonymen qosa, ózderine búkil bıznes pen barlyq azamat tólem jasasa da, bankter QQS-tan bosatylǵan. Biz saralanǵan salyq mólsherlemesin engizýdi usynǵan kezde bizge bunyń ádil básekelestik ustanymdaryn buzý ekendigin aıtyp jaýap beretin. Kimmen kimdi básekelestirmek? Bul – básekelestik emes, tonaýshylyq. Biz 30-dan astam depýtattyq saýal joldap, sonsha ret Salyq kodeksine túzetý engizdik. Prezıdent Q.Toqaev ótken joldaýlarynyń birinde ǵana saralanǵan salyq mólsherlemelerin engizýdi tapsyrǵan bolatyn. Biz Eýroodaqtaǵydaı azyq-túlik óndirýshileri men ózge de basym salalar salyqty az, al bankter men shıkizat olıgarhtary kóbirek tóleýi úshin ári qaraı da kúresemiz, – dedi A.Perýashev.
Budan bólek, «Aq jol» úgit-nasıhat toby Almaty elektromehanıkalyq zaýytynyń ujymymen de kezdesti.
