Ekijaqty kezdesýde ónerkásiptik kooperasııa jobalaryn iske asyrý, jeńil ónerkásip pen qorǵanys-ónerkásip kesheni men kólik salasyndaǵy yntymaqtastyqty keńeıtý máseleleri talqylandy.
Marat Qarabaev atap ótkendeı, baýyrlas memleketter ónerkásiptik kooperasııa salasynda 2,2 mlrd dollar somasyna 10,5 myń jumys ornyn ashýdy kózdeıtin 42 birlesken jobany iske asyryp jatyr. Onyń 29-y elimizde bolsa, 13 joba kórshiles elde júzege asyrylyp keledi.
Sondaı-aq kezdesý barysynda kólik salasyndaǵy jobalar, atap aıtqanda «Darbaza – Maqtaaral» jáne «Mazarı-Sharıf – Kabýl – Peshavar» jańa temirjol jelileriniń qurylysy jan-jaqty qaraldy. Máselen, Darbaza stansasynan Maqtaaral stansasyna deıingi uzyndyǵy 106 shaqyrymdaı jelini salýdy kózdeıtin jobasyn iske asyrý «Saryaǵash» ótkizý pýnktindegi júktemeni azaıtyp, jylyna 10 mln tonnaǵa deıin qosymsha júk aǵynyn tartýǵa, sondaı-aq Túrkistan oblysynyń Maqtaral aýdanyn negizgi temirjol tarmaǵymen baılanystyrýǵa jol ashady.
Sonymen qatar qos tarap eki el arasyndaǵy áýe reısterin ulǵaıtý joldaryn qarastyrýǵa kelisti.
Qazir kórshiles memleketter arasynda aptasyna 20 reıs oryndalyp kele jatqanyn aıta ketken oryndy. Aıtalyq, 5 reıs Astana – Tashkent, 14 reıs Almaty – Tashkent jáne 1 reıs Aqtaý – Nýkýs baǵytynda júzege asyrylyp keledi.
