Toraıǵyrov ýıversıtetiniń alleıasynda «Dos-Muqasan» músindik kompozısııasy ornalasqan. О́nerdiń bıik shyńyna shyqqan aǵalar munda sýretke tústi. Odan soń oqý ornynyń konsert zalynda oqytýshylar men stýdentter aty ańyzǵa aınalǵan ujymdy qoshemetpen qarsy aldy. Stýdentter mýzykanttarǵa ózderin qyzyqtyrǵan saýaldaryn qoıyp, erkin formatta pikir almasty. Jastardy ánshilerdiń alǵashqy gastrolin qandaı sezimdermen eske alatyny jáne qazirgi kúni qandaı áýen jazyp júrgeni qyzyqtyratyny baıqaldy.
– «Dos-Muqasan» toby qurylǵaly beri óz ánderin únemi ana tilimizde shyrqaıdy. Bizdiń shyǵarmashylyǵymyz otandastarymyzdyń jadynda osy ereksheligimen saqtalyp keledi. Shet memleketterde óner kórsetken ýaqyttary únemi óz tilimizde ún qatyp, qazaq tilin tanymal etýge tyrystyq, – dep atap ótti ansambldiń kórkemdik jetekshisi Murat Qusaıynov.
Bul kúngi kezdesýde meımandardyń qurmetine stýdentter arnaıy konserttik baǵdarlama ázirlegen eken. «ToU Band» stýdenttik toby óner tarlandarynyń aldynda birneshe án oryndady. Sonyń ishinde eki kompozısııa «Dos-Muqasannyń» repertýarynan shyrqaldy.
Negizi kerekýlikterdiń bul ansambldiń ónerine degen qurmeti erekshe. Músindik kompozısııadan bólek, oqý ornynda 2008 jyly «Dos-Muqasannyń» shyǵarmashylyǵyna arnalǵan murajaı da ashylǵan. Turaqty ekspozısııada qazaqtyń «Bıtlzy» týraly syr shertetin jádigerler, qujattar men fotosýretter saqtaýly. Bul eksponattardy kezinde dosmuqasandyqtar murajaıǵa ózderi tabys etken. Byltyr ansambldiń 55 jyldyǵyna oraı shaǵyn murajaı jańa keıipke endi.
PAVLODAR
