21 aqpan – Halyqaralyq ana tili kúni qarsańynda Qazaqstannyń Ulybrıtanııadaǵy elshiliginiń uıymdastyrýymen áserli kesh ótti. Oǵan «Dımash Qudaıbergen. Ulybrıtanııa jáne dúnıejúzi» fan-klýbynyń belsendi músheleri qatysty. Ulty basqa, tili bólek ár jankúıerdi dara daýysty Dımashtyń óner álemindegi bedeli bir araǵa toǵystyrdy. Ana tilimizge qurmet bildirip, úırenýge yntyqqan aǵylshyndardyń arasynda buryn Qazaqstanǵa saıahattap kelgenderi de bar. Olar bizdiń baı mádenıetimizden, salt-dástúrlerimizden jáne ulttyq taǵamdarymyzdan da habardar eken.
– Men negizi bala kútimi boıynsha kolledj stýdentterine leksııa oqımyn. Fan-klýbymyzdy 2022 jyldyń tamyzynda ashtyq, bar bolǵany 6 aı ótti. Kúni keshe 1 myńynshy múshemiz qatarymyzǵa qosylyp, qatty qýandyq, – deıdi fan-klýb tóraǵasy Djıll Bıchem.
Elshiliktiń uıymdastyrýymen ótken qazaqsha kýrsty «Habar 24» arnasynyń Londondaǵy tilshisi Ǵalymjan Qaramanulynyń qyzy Káýsar júrgizedi. Qazaq, aǵylshyn tilderine jetik Káýsar buǵan deıin «Balapan» telearnasynda balalarǵa aǵylshynsha úıretip, tájirıbe jınaqtaǵan. Endi, mine, ulttyq kıim kıip, brıtanııalyqtarǵa qazaq tiliniń ǵajaptyǵyn tanytýda.
«Qulaǵymdaǵy syrǵa men moınymdaǵy alqany Almatyǵa Dımashtyń konsertine barǵanda satyp aldym. Tereza qurbym ekeýmiz kólge bardyq, shatqaldardy da kórdik. О́te tamasha ýaqyt ótkizdik», deıdi fan-klýb múshesi Lýanna Kıpıng. «Men qazaqsha sálemdesip, jaǵdaı suraı alamyn. О́zimdi tanystyra alamyn», deıdi til úırenýshi Krıstına Breın.
Qazaq mádenıetine, tiline tánti bolǵan aǵylshyndar osylaı aqjarma tilekterin bildirip, kishkentaı jetekshilerine alǵys aıtyp jatqany biz úshin súıinish. Tereza Neves esimdi qala turǵyny: «Biz osy fan-klýbqa múshe bolǵanymyzǵa qýanamyz. Dımash barlyǵymyzdy úlken shańyraq astynda biriktirdi. Biz uıyǵan bir otbasyndaımyz», degen oıyn jetkizdi.
Atalǵan shara aıasynda halyqaralyq fan-klýb músheleri qaıyrymdylyq sharasyn da ótkizip, Qazaqstandaǵy «SOS balalar aýyly» úkimettik emes uıymyna qarajat jınap berdi. Jınalǵan aqshaǵa jetim nemese ata-anasynyń qaraýynsyz qalǵan balalar mýzykalyq aspaptar satyp ala alady. Qazaqtyń dástúrli dombyrasynda oınap úırenýge múmkindik alady.
– Biz ázirge 1 mln teńge jınadyq. Naýqan áli de jalǵasyp jatyr. Bul soma eselene túsedi dep senemiz. Birqatar josparymyz da bar. Aldaǵy ýaqytta «SOS balalar aýylynyń» tárbıelenýshilerine onlaın platforma arqyly aǵylshyn tilin úıretkimiz keledi. Sondaı-aq sol aýylǵa baryp oqytatyn muǵalimderge aqsha tóleý de oıymyzda bar, – deıdi Djıll Bıchem.
Halyqaralyq ana tili kúni qarsańynda ótken keshte túrli ult ókilderi óz tilderinde óleńder oqydy. Sosyn olar ánshi Dımashtyń shyǵarmashylyǵyna qatysty tanymdyq suraqtarǵa jarysa jaýap berip, onyń repertýaryndaǵy qazaqsha ánderdi oryndady.
