Naýqannyń alǵashqy kúnderiniń ózinde elimizdiń barlyq óńirinde 300 myń saılaýshyny qamtyǵan 3 myńnan astam is-shara ótken. Bul týraly partııanyń atqarýshy hatshysy Elnur Beısenbaev BAQ ókilderimen bolǵan kezdesýde aıtty. Ol jýrnalısterdi saılaýaldy shtabtyń jumysymen tanystyrdy. Atap aıtsaq, kandıdattardyń úgit-nasıhat jáne úılestirý ortalyqtarynyń, qoǵamdyq qabyldaý bólmesiniń, medıa-shtabtyń, kovorkıng alańynyń, sondaı-aq shtabtaǵy jastar sektorynyń atqaryp jatqan jumystaryn kórsetti.
– Partııanyń saılaýaldy shtaby «open space» qaǵıdaty boıynsha uıymdastyrylǵan jáne aptanyń barlyq kúninde táýlik boıy jumys isteıdi. Shtab – bul kópfýnksııaly saılaý naýqanyn basqarý ortalyǵy. Ár bólim birlesip jáne jedel túrde belgili bir sheshimder qabyldaıdy. Munda kandıdattar men senimdi ókilderdiń qatysýymen túrli is-shara, arnaıy oqytýlar ótkiziledi. Dál osyndaı front-keńseler barlyq aımaqta bar, – dedi Elnur Beısenbaev.
Aıta keteıik, shtab quramyna partııanyń 486 belsendi jaqtasy kirdi. Saılaýshylarmen kezdesý kestesi daıyndaldy. Sondaı-aq bul jumysqa úmitkerlerdiń 27 myńnan astam senimdi ókili de tartylǵan.
О́ńirler demekshi, partııanyń úgit nasıhat toby elordadaǵy Aqmola vagon jóndeý zaýytynyń ujymymen kezdesti. Munda amanattyqtar iri bıznes nysandaryn qoldaý sharalaryn talqylady. Máselen, Májilis depýtattyǵyna úmitker Dáýlet Turlyhanov zaýyt jumysshylarymen júzdesý kezinde bızneske qolaıly orta qalyptastyrý máselesin kóterdi. «Biz jeke bastama men naryqtyq ekonomıka kúshine nyq senemiz. Aldaǵy ýaqytta otandastarymyz «Qazaqstanda jasalǵan» tańbasy bar taýarlardyń joǵary sapasymen maqtanatyn bolady», dedi Dáýlet Turlyhanov.
Zaýytta 400-ge jýyq adam eńbek etedi. Olar jylyna 3 myńǵa tarta vagon jóndeıdi. Aldaǵy jospar – ınnovasııalyq tehnologııany qoldana otyryp, sapaly qyzmet kórsetý.
