«Maı» kásiporny – elimizdegi eń alǵashqy, Ortalyq Azııa aýmaǵyndaǵy kúnbaǵys maıyn óndiretin iri zaýyttardyń biri. Zaýyt sońǵy jyldary jabdyqtaryna tereń jańǵyrtý júrgizdi. Nátıjesinde, zaýyt tutynýshyǵa Premıým markaly tazartylǵan, ıissizdendirilip muzdatylǵan kúnbaǵys maıyn usynýǵa qol jetkizdi. Zaýyttyń jumys úderisi tolyǵymen avtomattandyrylǵan, kúnbaǵys tuqymdary qol eńbeginiń aralasýynsyz kúnbaǵys maıyna aınalady.
Zaýytta eń zamanaýı jabdyqtar – shveısarııalyq «Buhler» kompanııasynyń tuqymdardy avtomatty tazalaý jáne daıyndaý jelisi, sońǵy ónimniń erekshe sapasyn qamtamasyz etetin belgııalyq «De Smett Ballestra» kompanııasynyń joǵary tehnologııalyq tazalaý jelisi, plastıkalyq ydys óndirý jáne osy ındýstrııadaǵy álemdik kóshbasshy ıtalııalyq «Sipa» kompanııasynyń quıý jelisi ornatylǵan. О́ndiristiń jańa tehnologııalary men zamanaýı jabdyqtardyń arqasynda zaýyt shyǵaratyn kúnbaǵys maıy adam aǵzasyna qajetti paıdaly zattar men dárýmenderdi barynsha tolyq saqtaıdy.
– Biz Májiliste agrarshylar men otandyq azyq-túlik óndirýshilerin sózsiz memlekettik qoldaýǵa berik kepildikter beretin «Azyq-túlik qaýipsizdigi týraly» Konstıtýsııalyq zań qabyldaımyz. Otandyq bıznesti ımport qysymynan qorǵaý úshin jańa kedendik-tarıftik saıasatty qoldanysqa engizemiz. Kvazımemlekettik sektor arqyly aýyl sharýashylyǵy ónimderin ótkizý jáne kepildendirilgen satyp alý júıesin qurýǵa qol jetkizemiz, – dedi kezdesýde «Aýyl» partııasynan Májilis depýtattyǵyna kandıdat Qaırat Aıtýǵanov.
Kúnbaǵys maıyn óndirý tolyq avtomattandyrylǵanyn óz kózimen kórgen partııa músheleri zaýyt tynysyn joǵary baǵalap, ujymnyń aldaǵy jumysyna sáttilik tiledi. Kezdesý sońynda kandıdattar zaýyt jumysshylaryna «Aýyl» partııasy saılaýaldy baǵdarlamasynyń negizgi baǵyttaryn túsindirdi.
