Almatyda kandıdattar 100-den astam adamdy jumyspen qamtyp otyrǵan «APR Construction» JShS qurylys kompanııasynyń jumysshylarymen kezdesti. Kezdesýge Parlament Májilisiniń depýtattyǵyna kandıdattar Qyrmyzy Jandosova, Dınara Naýmova, Mahambet Hasenov, máslıhat depýtattyǵyna kandıdattar Albına Sarıeva men Araı Erkinuly qatysty.
Partııa ókilderi eńbek etip júrgen jastardy qoldaýdyń mańyzdylyǵy, kásipkerlerge múmkindik berý jáne elimizdegi túrli áleýmettik-ekonomıkalyq másele týraly aıtty. О́z sózinde Mahambet Hasenov eldegi halyqtyń birshama qıyn jaǵdaıyna nazar aýdardy. Bir nesıeni óteý úshin turǵyndardyń ekinshi nesıeni joǵary paıyzben alýǵa májbúr ekeni aıtyldy.
«Biz – halyqtyń ókilderimiz jáne qarapaıym jandardyń qandaı jaǵdaıda ómir súrip jatqanyn jaqsy bilemiz. Sondyqtan nesıelik saıasatty ózgertý kerek dep esepteımiz. Jeke tulǵalarǵa beriletin nesıeniń ótelý merzimin kem degende 20 jylǵa deıin uzartyp, paıyzdyq mólsherlemeni tómendetý kerek», dedi M.Hasenov.
Al Dınara Naýmova daryndy azamattardyń kóp nárseni, onyń ishinde saıasatty da ózgerte alatynyna toqtaldy.
– Men «Respublica» partııasynyń eń jas kandıdaty shyǵarmyn. Biz saıasatqa ne úshin bara jatyrmyz? Bizdiń árqaısymyzdyń artymyzda belgili bir jetistikter tarıhy bar. Oblystaǵy erekshe balalarǵa kómektesetin tegin ınklıýzıvti ortalyq ashýǵa muryndyq boldyq. «Respublica» partııasy qolymnan ne keletinin dáleldeýge taǵy bir múmkindik berdi. Osy arqyly men qoǵamǵa óz úlesimdi qosa alamyn, qazirgi tártipti ózgerte alamyn. Qazir jastarda barlyq múmkindik bar. Biz solardy paıdalanyp, qoǵamdy ózgertýimiz kerek, – dedi Dınara Naýmova óz sózinde.
О́z kezeginde Qyrmyzy Jandosova kez kelgen máseleni ashyq aıta alatyn arnaıy alań qurýdy josparlap otyrǵanyn aıtty.
