Júzdesý aıasynda seriktestik qyzmetkerlerine aldaǵy naýqannyń mańyzdylyǵy men partııanyń saılaýaldy baǵdarlamasy keńinen túsindirildi. Aımaqtaǵy ótkir máseleler kóterilip, sheshý joldary pysyqtaldy. Atyraý oblysy – elimizde ekologııa jaǵdaıy nashar óńirlerdiń biri. Kólik sanynyń artýyna baılanysty aýanyń lastaný deńgeıi de joǵary. О́ńirde qurǵaqshylyq máselesi de jyldan-jylǵa kúrdelenip keledi.
Májilis depýtattyǵyna kandıdat Maral Kóshenov partııanyń maqsattaryn túsindirip, ujym tarapynan túsken usynystardy aldaǵy áreket etý josparyna qosty. «West DALA» JShS bas dırektory Qaırat Salahadenov te Kaspıı teńiziniń tartylý jaıynda suraqtaryna jaýap aldy. Sonymen qatar shahardaǵy jeldi kúnderi bolatyn shańǵa qatysty «Baıtaq» partııasynyń pikirin bildi.
Buǵan deıin «Baıtaq» jasyldar partııasy «Taza ómir» atty bir aptalyq ekologııalyq marafonyn bastaǵan bolatyn. Is-sharaǵa aýasy lastanǵan qalalardyń turǵyndary, ekobelsendiler men partııa jaqtastary qatysyp jatyr. Aksııa ónerkásiptik kásiporyndardan atmosferalyq aýany lastaýshy zattardyń shyǵarylýyn azaıtýdy maqsat etip otyr. Sebebi iri ónerkásiptik qalalarda turatyn adamdar densaýlyqqa áser etetin zııandy jáne ýly zattarǵa toly aýamen tynys alýǵa májbúr. «Biz jeke sektordyń kómir otynynan tabıǵı gazǵa kóshýin jáne jańartylatyn energııa kózderin paıdalanýdy kózdeımiz», deıdi partııa basshylyǵy.
Partııadan Parlament Májilis depýtattyǵyna tizim boıynsha 18 kandıdat usynylǵanyn atap ótken jón. Olardyń qatarynda áıelder kvotasy boıynsha – 4, jastar kvotasymen – 1 jáne múgedektigi boıynsha 1 úmitker bar. Taǵy tórt úmitker majorıtarlyq júıe boıynsha saılaýǵa qatysady. Al jergilikti máslıhattarǵa 160 kandıdat tirkelgen. Esterińizge salsaq, «Baıtaq» jasyldar partııasy 2022 jyldyń sońynda ekologııalyq turaqty qoǵam qurý, halyqtyq demokratııa jáne ekologııaǵa uqypty qaraý qaǵıdattaryn qoldaý maqsatynda qurylǵan.
