Kezdesýde densaýlyq saqtaý júıesindegi ózekti máseleler kóterildi. Ásirese turǵyndar tarapynan mindetti áleýmettik medısınalyq saqtandyrý boıynsha saýaldar jıi qoıyldy.
«Elimizde medısınalyq saqtandyrylǵan azamattarǵa da medısınalyq qyzmet tolyq kólemde kórsetilmeı otyr. Bul týraly Joldaýynda el Prezıdenti ashyq aıtyp, bylyq jaılaǵan salany qatań synǵa alǵan bolatyn. Memleket basshysy Úkimetke erikti medısınalyq saqtandyrý júıesin engizýdi júktedi. Dese de, áli de shıkilik kóp», dep aǵynan jaryldy turǵyndar.
«Elektrondy úkimettiń 1414 baılanys ortalyǵynan keńes alǵanymda, operator bir turaqty jumys ornynan jarna aýdarylsa jetkilikti degen. Alaıda Medsaqtandyrý qorynyń 1406 baılanys ortalyǵynyń mamany barlyq jumys ornyńyzdan jarna tóleýge tıissiz dedi. Turaqty jumys ornymda jumys berýshim jalaqymnan qorǵa onsyz da qomaqty soma aýdarady. Buǵan qosa, lısenzııa alyp, advokattyqty bastap, artynsha tastaǵanmyn, biraq sol úshin de aı saıyn 4 200 teńgeden aýdaryp turýym kerek. Bul shekten shyqqandyq emes pe? Qor nege menen aı saıyn birneshe jarna alady? Tegin medısınalyq qyzmetin tutynyp otyrǵan joqpyn. О́ıtkeni emhanada ne dáriger joq, ne onyń qabyldaýyna shuǵyl jazylý qıyn. Amalsyz, aqyly klınıkalarǵa júginemin», dedi turǵyndardyń biri.
Maqsut Nasıbýlov medısınalyq saqtandyrýdyń qoldanystaǵy júıesi tolyqqandy tıimdiligin kórsete almaı otyrǵanyn jasyrmady. Saldarynan azamattardyń da, memlekettiń de densaýlyq saqtaý shyǵyndary toqtaýsyz artyp barady.
– Sozylmaly aýrýǵa shaldyqqan turǵyndar kepildendirilgen tegin dári-dármekti ala almaı júr. Bul júıe shendilerdiń qyzyǵýshylyǵy úshin iske qosylǵandaı áser qaldyrady. Joba ózin aqtady dep aıta almaımyz. Bul júıe áleýmettik kerneýdi kúsheıtetin teris faktorlardyń kósh basynan oryn almaýy úshin ahýaldy tez túzegen abzal, – dedi Maqsut Nasıbýlov.
